almrsal 6y0f 6y0f

دورة فى ال GSM كاملة ان شاء الله

الموضوع في 'قسم تبادل الخبرات الهندسية' بواسطة bossnemo, بتاريخ ‏فبراير 16, 2008.

  1. bossnemo

    bossnemo Member

    إنضم إلينا في:
    ‏ديسمبر 22, 2007
    المشاركات:
    32
    الإعجابات المتلقاة:
    24
    نقاط الجوائز:
    8


    [​IMG]
    السلام عليكم ورحمه الله وبركاته

    ان شاء الله يا جماعة انا هبتدى اشرح كورس GSM كامل ان شاء الله .
    وان شاء الله مش هسيب اى حاجة فى الكورس الا لما اشرحها .
    على فكرة الكورس ده مهم جدا للناس الى عاوزين يشتغلوا فى شركات الاتصالات
    وان شاء الله لما يخلص الكورس ده هبتدى فى كورس ال gprs وكورس ال CDMA وكورس ال UMTS .
    المهم خلينا الاول فى كورس ال GSM الكورس ده جميل وممتع جدا وشيق وانا عاوزكم تدونى رأيكم فى الشرح واى حد يحتاج يفهم اى حاجة انا جاهز ان شاء الله .وان شاء الله الشرح هيكون بطريقة سلسة وجميلة ان شاء الله ..
    فى حاجة مهمة
    الشرح هيكون من منهج معمول بالبوربوينت وانا هعرضهلكم على هيئة صور العرض ده بتاع المهندس/ وليد الصافورى وهو ده المهندس الى انا فهمت منه ال GSM كويس جدا وربنا يباركله ويجعل الشرح ده فى ميزان حسناته..........

    [​IMG]
    نبدأ باذن الله تعالى

    [​IMG]

    ده يا جماعة الكورس بتاعنا وهو بيتكون من خمس شباتر

    الاول هيبقى فيه تعريف بالنظام والتكنولوجيا المستخدمة فيه وغيره
    الثانى هنتكلم فيه عن مكونات نظام الGSM
    الثالث هنتكلم فيه عن الباند بتاع النظام وتقسيمه وطرق الارسال
    الرابع هنتكلم فيه عن المراحل الى بتمر بيها الاشارة من اول الميك بتاع التليفون الى الارسال والاستقبال
    الخامس هنتكلم فيه عن بروتوكولات التعامل بين اجزاء الشبكة

    نبدا باذن الله فى المقدمة

    [​IMG]

    دى يا جماعة الحاجات الى المفروض انها تكون موجودة فى اى نظام اتصالات ناجح

    اولا : توصيل اكبر قدر من المعلومات من المرسل الى المستقبل
    ودى طبعا هتعتمد على الباند بتاعى بتاع الموبايل لك انا ممكن
    اقسم الباند بتاعى الى مجموعة كبيرة من ال Channels وبكدة اكون
    زودت ال Capacity لكن ال Quality هتقل لان ال B.W لكل Channel
    هيقل يعنى لازم يكون فى حل وسط وهنشوف ال GSM حل الموضوع ده ازاى.

    ثانيا : توصيل المعلومة فى اقصر وقت ممكن
    احنا طبعا يا جماعة ساعات بنلاحظ واحنا بنتفرج على متش كورة
    مثلا ان واحنا فى البيت بنلاقى ان الجون دخل والناس هيصت على
    القهوة والكورة عندنا لسة فى نص الملعب وبعد كدة نلاقى الجون
    دخل وده طبعا زى محنا عارفين علشان اكيد هنكون احنا بنتفرج
    على الماتش على قنا فضائية والى فى القهوة بيتفرجوا على قناة
    ارضية وده ينتج عنه تاخير فى الاشارة عبال لما ترسل ثم تستقبل من
    القمر الصناعى ويعاد ارسالها مرة اخرى .
    وطبعا الموضوع ده مش مقبول فى النظام بتاعنا

    ثالثا : محاولة القضاء على ال error الموجود فى الاشارة
    طبعا احنا بنرسل فى وسط مليان Noise وهو الهواء ومعنى كدة ان
    الاشارة بتاعتنا هتوصل مليانة error . هنشوف ان شاء الله الحلول
    الى عماناها علشان نحاول نخلى المعلومة المستقبلة بنقاء كويس.

    [​IMG]

    طبعا احنا شايفين الاتنين دول كانت وسيلة الاتصال الوحيدة ايامها هى الكلام


    لكن الانسان فى تطور لقى انه لازم يكون فى وسيلة افضل للاتصال

    [​IMG]

    بقى يولع شجرة زى محنا شايفين او يشاور ببيارق او يعمل صوت كبير بالطبول وغيره لكن لسة برده الوسائل دى محدودة جدا .

    [​IMG]

    وفضل الانسا فى تطور لغاية لما اختع اول وسيلة لنقل المعلومات بسرعة كبيرة وهة التلغراف ودى كانت بتطتلب مد اسلاك بمسافات كبيرة .وكان بيستخدم اشارة مورس ودى طبعا متعبة جدا على المرسل والامستقبل علشان كدة لو حاولت تيعت تلغراف هتلاقيهم بيحاسبوك على الحرف..

    [​IMG]

    [​IMG]

    [​IMG]

    [​IMG]

    وطبعا اى نظام اتصال بيتكون من مرسل ومستقبل ووسط لنقل المعلومة
    والوسط هنا اما ان يكون باسلاك زى التليفون الارضى .الى اخترعه جرهام بل وكان الاول بيستخدم نظام السويتشات يعنى لو حضرتك عاوز تتصل باى حد يقوم عامل يوصلك بسوكت مع الاخ الى انت عاوز تتصل بيه يعنى الموضوع يدويا وده طبعا متعب جدا وعاوز عمالة كبيرة جدا وبيتكلف كتير وخصوصا مع زيادة المستخدمين وهنا ومع التطوير اصبح التليفون الارضى بيستخدم سويتشات الكترونية سهلت كتير اوى

    [​IMG]

    او بدون اسلاك زى شبكة المحمول.

    [​IMG]

    طيب تعالوا نعمل مقارنة بي الاتصال السلكى والاتصال الاسلكى
    من حيث اولا : نسبة الفقد
    بالطبع النظام اللاسلكى اكثر فقدا للاشارة من النظام
    السلكى .

    ثانيا : امكانية التحرك
    اكيد النظام اللاسلكى هو الذى يملك القدرة على التحرك

    ثالثا : الامان
    النظام السلكى اكثر امنا فى نقل المعلومة لكن هنشوف
    احنا عملنا اية فى الGSM علشان نخليه امن جدا .

    رابعا : ال B.W
    لكل نظام ظروفه فى ال B.W فمثلا بالنسبة للنظام السلكى
    لكل سلك وله الخولص بتاعتة وال Frequency الى يقدر
    يشيلها وبالنسبة للنظام اللاسلكى هيبقى حسب الباند الى
    انا محكوم بيه

    خامسا : التكلفة
    ودى مش هنقدر نحكم عليها الا بعد معرفة المسافة


    CH 1


    [​IMG]

    طيب تعالوا نشوف انواع التليفونا عموما

    طبعا النوع الاول هو التليفونات الارضية العادية
    النوع الثانى وهو التليفون اللاسلكى
    النوع الثالث وهو التليفونات المحمولة

    طيب تعالوا نشوف طرق الارسال والاستقبال فى الظم اللاسلكية

    [​IMG]

    ده اول نوع : وبيكون فيه المرسل يقوم بالارسال فقط وذلك طوال الوقت
    زى التليفزيون والراديو

    [​IMG]

    وده النوع الثانى : وبيكون المرسل والمستقبل بيرسلو ويستقبلوا ولكن مش فى
    نفس الوقت يعنى لازم تحدد الاول اذا كنت هترسل ولا
    تستقبل . وده بيكون على نفس ال Channel
    زى اللاسلكى بتاع الشرطة


    [​IMG]

    وده النوع الثالث : وبرده المرسل والمستقبل بيرسلوا ويستقبلوا ولكن ده
    بيتم فى نفس الوقت وعلى قناتين مختلفتين 2Channel

    طيب يا ترى احنا بننقل المعلومة ازاى يعنى اية التقنية الى احنا بنستخدمها فى نقل المعلومات من المرسل الى المستقبل .طب متيجوا نشوف التقنيات المستخدمة اصلا فى النظم اللاسلكية.

    [​IMG]

    تعالوا بقى نشوف نوع نوع من الانواع دى ونشوف بيشتغل ازاى ونعرف احنا بنستخدم اية فى ال GSM

    [​IMG]

    النوع الاول وهو frequency division multiplexing او FDM

    [​IMG]

    وهو تقسيم الباند بتاعى الى مجموعة من ال carrier بحيث يكون لكل user ال carrier الخاص به سواء كان بيتكلم او لا . وده طبعا هيخلى ال capacity قليلة جدا
     
  2. bossnemo

    bossnemo Member

    إنضم إلينا في:
    ‏ديسمبر 22, 2007
    المشاركات:
    32
    الإعجابات المتلقاة:
    24
    نقاط الجوائز:
    8
    [​IMG]

    وده النوع الثانى وهو time division multiplexing اوTDM

    [​IMG]

    وهي تقسيم الـ channel لعدد من الـ time slots
    وكل user له الـ time slot الخاص به سواء كان بيتكلم او لا .وبرده كانت فى نفس المشكلة وهى صغر ال capacity

    ثوانى يا جماعة هو يعنى اية اصلا انى اقسم الباند الى carrier او انى اقسمه ال time slots هو ال time بيتقسم اصلا .
    بصوا يا جماعة هفرض ان الباند المسموح لية من 900 mhz الى 1000 mhz
    يعنى المسموح لية هو 100 mhz بس وده ال frequency الى انا هحمل عليه الاشارة طبعا مش الاشارة نفسها. ماشى .طيب دلوقتى انا عاوز ابعت اى معلومة هعمل اية ؟ طبعا مش ممكن انى ابعت المعلومة دى على ال 100 mhz دول وبس لا انا هحتاج الى ابعت كذا معلومة فى نفس الوقت طيب متيجوا نقسم ال 100 ميجا دول الى 10 اقسام كويس يعنى كدة ممكن ابعت ل 10 مستخدمين مرة واحدة فى نفس الوقت .(طب ولية عشرة لان مش هينفع ابعت ل 2 مستخدمين على نفس التردد فى نفس الوقت هيحصل تداخل )
    طب متخلينا نفسمهم الى 100 قسم يعنى ممكن ابعت ل100 مستخدم مرة واحدة مش كدة .عظيم انا كدة زودت العدد ....خد بالك منقدرش نقسمها الى عدد كبير اوى كدة علشان كل لما التردد بتاع 2 مستخدمين يقرب م بعضه اوى كدة كل لما هيسببلى شوشرة وتداخل عارفين زى اية زى لما تلاقى فيه قناتين راديو داخلين على بعض ..يبقى لازم الموضوع يبقى محكوم شوية فعندى فى ال GSM بخلى كل carrier يساوى 200 هرتز ..
    بالنسبة للوقت يا جماعة الوقت مش بيتقسم بالمعنى المفهوم لكن هو الى بيحصل انى ببعت اشارة على تردد معين وبعدها علطول ابعت اشارة تانية على نفس التردد وبعديها علطول اشارة تالته على نفس التردد وهكذا يبقى انا كدة بعت على نفس التردد من غير ميبقى فى تداخل وهى دى نظرية عمل ال TDM.طبعا ممكن واحد يقول هو لما اعمل كدة المستخدم مش هيحس بتاخير .كفاية انك تعرف انى ببعت ل 8 مرات فى كل 20 مليثانية تخيل وطبعا الانسان مش بيحس بالفرق البسيط ده عموما الكلام ده هنقوله ان شاء الله بالتفصيل .....

    نرجع تانى لموضوعنا
    طبعا انتوا شايفين ان الكلام ده مينفعش ده انا عندى النهرده ملايين شايلين موبيلات .. وانا بحجز لكل واحد تردد خاص به مش هينفع
    طب والحل اية.......


    [​IMG]


    النوع التالت
    ال frequency division multiple access او FDMA
    وهي مثل الـ FDM ولكن ليس كل user له الـ carrier الخاص به بمعنى انه يتم تبادل الـ carriers في حين وجودها خاليه

    [​IMG]

    النوع الرابع
    ال time division multiple access او TDMA
    وهي تقسيم الـchannel الواحدة لعدة frames
    وكل frame يحتوي علي عدد من الـ time slots
    وكل user له الـ time slot الخاص به ولكن كل مجموعة
    من الـ users تشترك في radio frequency واحدة
    وعددهم ثابت . وهذا النوع غير مستخدم غالبًا

    النوع الخامس
    ال time division multiple access/frequency division multiple
    access
    او TDMA / FDMA
    وهي من مسماها مزيج بين النوعين ونقوم فيها بتقسيم كل band الى عدة channels وكل channel لعدة frames و كل frame لعدة time slots وكل user يرسل في time slot واحد
    ولحساب عدد user يتم حساب عدد الـcarriers مضروب في
    عدد الـ time slots للـ frame الواحد
    وفى اى وقت نقول فيها TDMA يبقى المقصود TDMA / FDMA تمام يا جماعة

    طيب تعالوا بقى نشوف البدايات بتاعة الموبايل بتاعنا من اول الجيل الاول الى الجيل التالت ونعمل بينهم مقارنة

    تعالوا نبدأ من الاول خالص من قبل الجيل الاول حتى


    [​IMG]

    طبعا انتوا شايفين الراجل الى على العربية ده الجهازالى جمبه ده عبارة عن الموبايل الاول ونظرا لانه كان لازم يتشال على عربية فعلشان كدة اشتقوا اسم الموبايل من اسم العربية .اوتوموبيل

    [​IMG]

    وكان النظام القديم ده مشاكله كتير اوى زى محنا شايفين كان غالى جدا ومفيهوش ربط بين المناطق البعيدة والسعة بتاعة المستخدمين قليلة وال power المرسلة من الابراج بتاعته كانت مضرة على الانسان

    تعالوا بقى نشوف ال First Generation

    [​IMG]

    زى محنا شايفين دى كانت الخصائص بتاعته
    كان بيستخدم analog system وطبعا احنا عارفين مشاكل ال analog
    وعموما احنا هنعمل مقارنة بين ال analog system وال digital system
    كمان شوية
    وكان كل دولة ولها نظام معين وتردد معين شغالة عليه يعنى مينفعش يبقى فيه تجوال
    كمان مكنش بينقل الا صوت وبس
    وبالطبع علشان التشفير فى ال analog systems صعب ومكلف فمكنش فيه تشفير للمعلومات المرسلة
    وكان بيستخدم ال FDMA
    وكان بيستخدم ال Frequency Modulation

    [​IMG]

    [​IMG]

    طيب تعالوا نشوف ال Second Generation

    [​IMG]

    الجيل التانى ظهر فى اوائل التسعينات
    وكان بيستخدم نفس التردد على مستوى الدول كلها علشان كدة كان فيه موضوع التجوال .واستخدمنا فيه ال digital system علشان كدة قدرنا نعمل تشفير للبيانات بسهوله وقدرنا ننقل data عبارة عن SMS فى الاول لغاية لما الموضوع تطور وبقينا ندخل على النت وننقل رسايل مالتيميديا بعد ادخال تقنية ال GPRS

    [​IMG]

    واستخدمنا فيه ال TDMA وعلشان كدة ال capacity بقت كبير (احنا قلنا لما نقول TDMA يبقى قصدنا TDMA/FDMA )
    وطبعا الموبايل نفسه تطور وبقى صغير

    [​IMG]

    وده الباند المستخدم فى الدول المختلفة

    [​IMG]

    ودى التغطية بتاعة الجيل التانى وزى محنا شايفين التغطية تعتبر فى جميع انحاء العالم..المناطق الى مفيهاش تغطية دى زى اليابان وامريكا الجنوبية كانت بتستخدم انظمة اخرى غيى ال 2G


    وده ال Third Generation
    [​IMG]

    وطبعا الجيل التالت بقى يخلينا نتكلم فى اى حتة حتى لو مفيهاش تغطية وده عن طريق القمر الصناعى
    وكمان رسائل الوسائط المتعددة زى الفيديو والصور وغيره
    واستخدم تقنية جديدة وهى الً WCDMA
    واستخدم كمان ال smart anttena وان شاء الله هنقول عنها نبذة صغيرة ادام شوية...........

    [​IMG]

    ده جدول فية مقارنة بين جميع الاجيال


    طيب احنا قلنا ان احنا استخدمنا digital system من اول الجيل التانى يعنى حولنا من analog الى digital طيب يا ترى لية عملنا كدة
    طب متيجوا نشوف الفرق بين النظام ال analog والنظام ال digital
    احنا الاول هنعمل شوية حاجات نقرن من خلالها

    [​IMG]

    اول حاجة : ال capacity
    من مزايا النظام الرقمى هى امانية ضغط الاشارة بكفاءة كبيرة جدا طب هو الضغط ده مش هيقلل عدد ال bits طب مكدة يبقى الاشارة الى هرسلها هتبقى صغيرة يبقى كدة انا قللت ال B.w بتاعى صح يبقى هقدر اخلى المستخمين اكتر وطبعا الكلام ده مش موجود فى ال analog system

    تانى حاجة : التوافق مع باقى الانظمة
    طبعا ال GSM مش نظام لوحده لا ده فى انظمة كتيرة بيتعامل معاها زى الانترنت وال ISDN وغيره يبقى لازم يكون متوافق مع الانظمة دى

    تالت حاجة : التكلفة
    ودى طبعا لان الانظمة الرقمية بتستخدم hardware تكلفتة اقل بكتير من الانظمة التشابهية زى التشفير زى ماهنشوف

    رابع حاجة : نقاء وجودة الاشارة المرسلة

    [​IMG]

    يعنى زى محنا شايفين فى الاشارة ال analog ممكن ال noise تبوظ الاشارة خالص ولما استقبلها هلاقسها بايظة وقيمها اتغيرت

    [​IMG]

    اما بالنسبة للاشارة ال digital فهى عبارة عن 0 و 1
    يعنى ال noise مش هتاثر عليها بشكل كبير اوى .الا اذا كانت noise عالية شوية ممكن تخلى ال0 يبقى 1
    ودى حلها بسيط انى بعمل خانة فيها bit بتوضحلى عدد ال 0 وال 1 الموجودين فى الاشارة غير كدة انا بعمل
    error ditection and correction للاشارة فى الاستقبال زى ماهنشوف ان شاء الله

    خامس حاجة : تشفير المعلومة المرسلة
    التشفير فى ال analog صعب ومكلف واصلا الاجهزة الى هستخدمها علشان اعمل تشفير هتاثر على الاشارة
    اما بالنسبة لل digital فالتشفير سهل جدا وفى طرق كتير للتشفير زى ان شاء الله ماهنشوف.

    نبدا ان شاء الله فى بنية نظام ال GSM
     
  3. bossnemo

    bossnemo Member

    إنضم إلينا في:
    ‏ديسمبر 22, 2007
    المشاركات:
    32
    الإعجابات المتلقاة:
    24
    نقاط الجوائز:
    8
    هنبدا ان شاء الله يا جماعة فى بنية نظام ال GSM
    طبعا يا جماعة احنا بنتعامل مع نظام لاسلكى علشان كدة لازم يكون فية محطات ارسال واستقبال فى جميع المناطق الى عاوزين نعمل فيها تغطية المحطات دى بنسميها Base Transceiver Station او Base Station وهنكلم عنها ان شاء الله فى الشبتر الى جاى
    والمنطقة الى بتغطيها الBTS هنسميها cell تمام
    طب فى ال cell دى هنخلى فيها الباند كله مثلا .طب لو خلينا فيها الباند كله لما نحط cell تانية جمبها هيبقى فى مشكل ال interference بينهم . طب الحل اية

    [​IMG]

    طيب احنا ممكن نبعد ال الاتنين عن بعض شوبة علشان ميحصلش interference

    [​IMG]

    بس المشكلة هنا ان هيبقى فى dead zone بينهم مفيهاش تغطية
    طب والحل .... الحل ان احنا نخلى بين الاتنين cell الى بيسنتخدموا نفس التردد اتنين cell فيهم ترددات تانية غير المستخدمين فى الاتنين cell الى هيحصل بينهم تداخل
    يعنى وبمعنى اخر احنا هنحاول نخلى مفيش اتنين cell بيستخدموا نفس التردد جمب بعض خالص بس ده هيحصل ازاى ...هنوزع الباند بتاعنا على مجموعة من ال cells بطريقة متساوية ......طيب متيجوا نشوف ال cell دى اصلا بيبقى شكلها اية

    [​IMG]

    هى طبعا هتبقى شكلها دائرى وطبعا هنضطر نعمل بينهم تداخل علشان ميبقاش فى منطقة ميتة ولو قربنا الشكل ده هنلاقية بقى شكل سداسى
    وهو ده الشكل المتعارف عليه فى اشكال ال GSM cells

    طيب يا ترى الاشعاع بيبقى شكله عامل ازاى بيبقى دائرى ولا على الشكل السداسى ده ولا اية

    [​IMG]

    لا هو بيبقى شكله مش منتظم خالص وده طبعا علشان الطبيعة الجغرافية وغيره علشان كدة بنلجأ لاساليب القياس فى اماكن مختلفة حول ال cell علشان نقرر ال cell الى هتبقى جمبها موقعها هيبقى فين

    طيب تعالو نرجع تانى لموضوع توزيع الباند بتاعنا احنا قولنا ان احنا بنقسم الباند لعدد من ال carriers وبما ان الباند بتاعى ثابت مبيزدش يبقى عدد ال carriers ثابت برده معنى كده ام عدد ال channels فى ال system كله ثابته طيب هنعمل اية لو عاوزين نزود ال capacity
    بصوا يا جماعة احنا قولنا اننا هنقسم الباند على ال cells بحيث مخليش اتنين cell بيستخدموا نفس التردد جمب بعض علشان ميحصلش تداخل تمام ...
    طيب ياترى هما هيبقوا كام cell ... احنا لو زودنا عدد ال cell المقسمة عليها الباند كله يبقى كدة انا زودت المسافة بين الاتنين cell الى بيستخدموا نفس التردد وبكدة التداخل الى بينهم هيقل صح .. بس فى نفس الوقت ال capacity هتقل اوى لاننا خلينا عدد ال ؤاشىىثمس بتاعتى كلها فى منطقة كبيرة وعدد المستخدمين فيها كبير يبقى هضطر انى اقلل عدد ال cell المقسمة عليها الباند ....طيب هو احسن عدد ليهم اية بعد دراسات لقينا ان احسن عدد يتوزع عليه الباند كله يبقى 7 cells ...

    [​IMG]

    والمجموعة دى من ال cells بنسميها cluster ......وال cluster ده بيبقى فيه كل الباند بتاعى بالكامل موزع بالتساوى على ال7 cells
    الموجودين فيه

    [​IMG]

    ولو لا حظنا فى التكوين بتاع الشبكة هنلاقى ان احنا خلينا بين كل cell واخرى بيستخدموا نفس التردد اتنين cell زى مهمو موضح فى الصورة الى فوق
    ال cells الى لونهم اصفر هما الاتنين cell الى فيهم نفس التردد

    كل اتنين cell بيستخدموا نفس التردد بنسميهم co-channels cell

    والمسافة الى بينهم بنسميها reuse distance

    [​IMG]

    cell sectorization

    احنا يا جماعة عاوزين على قد مانقدر نقلل التداخل الناتج عن ال
    co-channels

    الجماعة الى عملوا نظام ال GSM لقوا انهم لو قسموا ال cell الى اجزاء التداخل هيبقى اقل طب ازاى تعالوا نشوف ...

    [​IMG]

    فى الصورة الى فوق دى احنا شايفين المستخدم M لو احنا مكناش قسمنا كان هيتأثر بجميع ال cells (الى بتستخدم نفس التردد) الى حوليهيعنى هيتأثر ب 6 cells
    لكن بعد التقسيم الى احنا عملناه لاحظوا كده.. هنلاقى ان المستخدم M
    بيتأثر باتنين cell بس (وده لو فى مستخدم زيه بيتكلم على نفس التردد فى ال sector المواجه له) يبقى احنا كدة وفى اسوأ الظروف قللنا التداخل بقدار التلتين..

    طيب هو احنا بنقسم ال cell دى ازاى

    [​IMG]

    زى محنا شايفين فى الصورة الى فوق دى احنا ممكن نقسم ال cell الى 6 اجزاء وده هيقلل التداخل بصورة كبيرة جدا بس احنا كدة هنضطر نركب انتنا فى كل جزء من الاجزاء الا 6 وده طبعا هيبقى مكلف جدا .
    علشان كدة احنا هنكتفى بتقسيم ال cell الى ثلاث اجزاء , وكل جزء هيبقى فيه انتنا تشع فيه زى الصورة الى جاية دى

    [​IMG]


    [​IMG]

    هنفرض يا جماعة ان احنا هنعمل تغطية فى منطقة جديدة ولسة مفيهاش كثافة هنعمل اية .. هنا هنخلى ال cells كبيرة شوية ...ثوانى استنوا هو احنا لو كبرنا ال cell عدد ال channels الى فيها هتزيد ولا تقل؟؟؟

    ركزوا معايا يا جماعة شوية احنا قولنا ان الباند بتاعى بوزعه فى ال cluster يعنى عدد ال channels فى ال cluster الواحد ثابته تمام ..
    طيب هو ال cluster فيه كام cell.. تمام فيه 7 cell بنوزع عليها ال channels معنى كدة ان كل cell فيها نفس عدد ال channels الموجود فى اى cell تانية يعنى عدد ال channels ده ثابت مبيتغيرش ...
    معنى كدة انى لو كبرت ال cell او صغرتها مش هتفرق معايا زيادة فى اعداد ال channels ..
    امال احنا بنكبر ال cell او نصغرها لية ...
    لو فرضنا ان فى مساحة معينة زى الى فى الصورة الى فوق دى
    المساحة دة كانت مفيهاش ناس كتير يبقى ممكن اوفر واعمل cell واحدة وهتكفيهمبس الفرق انى هزود ال power المنتجة منها وبس
    طيب ولو الكثافة ذزادت فى المنطقة دى ؟ عادى هنزود عدد ال cells
    وبكدة يبقى زودنا عدد ال channels بس هنقلل ال power شوية
    طيب ولو زادت الكثافة اوى اوى برده هنقلل ال power من كل ال cells
    ونزود عددهم .. وده بنسميه splitting cell

    [​IMG]

    يبقى انا بعمل cell splitting لما احتاج ازود ال capacity فى منطقة معينة .....

    [​IMG]

    وممكن توصل انى احول cell الى cluster وطبعا بنعيد ترتيب الترددات مرة تانية

    طيب تعالوا بقى يا جماعة نشوف انواع ال cells

    [​IMG]

    النوع الاول : macrocell

    وتستخدم فى المناطق ذات الكثافة القليلة ومداها اعلى من 20 كيلو متر

    النوع الثانى : microcell

    وتستخدم فى المناطق ذات الكثافة الاكبر واقصى مدى لها 3 كيلو متر

    النوع الثالث : picocell

    تستخدم فى المناطق ذات الكثافة العالية جدا وتوضع داخل المبانى او المولات او فى الشوارع المزدحمة جدا ومداها حوالى 200 متر.

    [​IMG]

    ويتم ربط جميع ال picocells باسلاك ثم تجميعهم الى انتنا اعلى المبنى

    النوع الرابع : highway cell

    [​IMG]

    وتستخدم فى الطرق السريعة وبتبقى ب 2 انتنا بس كل انتنا فى اتجاه من اتجاهات الطريق

    [​IMG]


    طيب احنا قولنا ان ال cluster بيبقى فيه كل الترددات الى فى النظام بالكامل والترددات دى بتتوزع على ال cells الموجودة فى ال cluster ده .... طيب تعالوا نشوف الترددات دى بتتوزع ازاى على ال cells

    [​IMG]

    هنفرض ان عندنا cluster فيه 3 cells والباند كله عبارة عن 9 ترددات بس تعالوا نشوف المقترحات لتوزيع الترددات دى على ال cells واية المستخدم فعلا فيهم ....

    اول اقتراح : Fixed Channel Assignment Teq

    وهو ان نقوم بتوزيع الترددات بالتساوى على ال cells
    اى ان تكون لكل cell الترددات الخاصة بها
    ولكن المشكلة هنا اذا حدث ضغط على cell من ال cells الثلاثة . هيبقى عندى ترددات غير مستخدمة مع انى محتاج ليها

    تانى اقتراح : Dynamic Channel Assignment Teq

    وهو جعل الترددات جميعها متاحة لاى cell تحتاجها وهو حل رائع
    ولكنه سيسبب طول فى مدة اجراء المكالمة لان النظام سوف يقوم بالبحث عن الترددات الشاغرة لاعطاءها للمتصل

    ثالث اقترح : Hybrid Channel Assignment Teq

    وهنا اخذنا مزايا الاقتراحين معا فسوف نوزع بعض الترددات على ال cells وجعلها ثابتة وسوف نترك بعض الترددات متاحة للجميع


    طيب تعالوا بقى نشوف المشاكل الى بتقابل الاشارة بتاعتنا وهى مبعوتة من ال BTS ال MS Mobile Station

    بس تعالوا الاول نتكلم عن ال Adaptive Power Control

    [​IMG]

    زى محنا شايفين فى الصورة فى حالة ال MS الموجود قريب من ال BTS
    هل هتكون ال power المرسلة من ال BTS هى نفسها المرسلة الى ال MS البعيد عنها ...
    تقوم ال BTS بحساب المافة بينها وبين ال MS وعلى هذا الاساس تقوم بتحديد قيمة ال power المرسلة لل MS
    طيب وده هيفيدنا فى اية ...
    اولا بالنسبة للنظام
    احنا كدة وبالنسبة لل MS القريب ده قللنا ال power المرسلة وبكدة مسافة الاشارة هتبقى اقصر وبكدة قللنا التداخل مع ال cell الاخرى التى تستخدم نفس التردد
    ثانيا بالنسبة لل MS
    طبعا ال power المرسلة من ال BTS تساوى ال power المرسلة من ال MS
    اثناء المكالمة وطالاما هنقلل ال power المرسلة من الBTS يبقى ال MS هيقلل ال power المرسلة منه برده يبقى احنا كدة حافظنا على التأثير الضار للpower العالية على المستخدم وفى نفس الوقت حافظنا على بطارية الموبايل......الكلام ده كله يحدث اثناء المكالمة فقط...

    نرجع بقى لموضوعنا وهو المشاكل التى تتعرض لها الاشارة المرسلة من الBTS الى ال MS
     
  4. bossnemo

    bossnemo Member

    إنضم إلينا في:
    ‏ديسمبر 22, 2007
    المشاركات:
    32
    الإعجابات المتلقاة:
    24
    نقاط الجوائز:
    8
    [​IMG]
    اول مشكلة

    Multipath Fading

    طبعا يا جماعة احنا بننقل الموجات بتاعتنا فى الهواء وبالطبع من خصائص الموجات دى انها ممكن تصطدم باى جسم وترتد منه مرة تانية ..
    طيب معنى كدة ان الاشارة المرسلة من ال BTS الى ال MS بتروح فى كذا مسار تمام
    طيب الاشارات دى بقى لما توصل للموبايل اية الى هيحصل . طبعا كل اشارة منهم هتوصل ب phase غير التانية .. المشكلة هنا ان لما توصل الاشارات دى ولانها بنفس التردد هيستقبلها الموبايل وهيجمعها ..طيب تخيل بقى لو مجموع الاشارات دى بقى 0 طبعا مش هيبقى فى اشارة ..طيب افرض بقى ان الموبايل ثابت معنى كدة ان ال paths هتفضل ثابتة وبكدة بقى فى منطقة مفيهاش شبكة خالص .....

    طيب هو اية انواع ال Multipath Fading

    النوع الاول : Rician fading

    [​IMG]

    وبيكون فيه ال MS وال BTS على خط واحد Line Of Side
    وطبعا بيكون فى اشارات تانية جاية من انعكاسات كتيرة
    وفى النوع ده مفيش مشكلة لان ال MS بيشوف ال BTS وبالتالى هيكون بيستقبل اشارة ب power عالية ومش هيتأثر بباقى الاشارات

    النوع الثانى : Rayleigh Fading

    [​IMG]

    وبيكون فيه ال MS فى مكان لا يرى فيه ال BTS يعنى No Line Of Side

    وطبعا دى الحالة الاكثر شيوعا ..وهنا بتكون المشكلة ان لما الاشارات المرتدة من الاجسام الى حول الموبايل وصلت الى الموبايل ومحصلتها 0 .

    طيب تعالوا نشوف اية الى قاله عم Rayleigh ده
    نظرية Rayleigh بتقول انه وفى حالة ارسال اشارة معينة من المرسل الثابت الى المستقبل الثابت فى نفس المسار ولكن بترددين مختلفين فان نتيجة ال Fading ستكون مختلفة.

    طيب تعالوا بقى نشوف اية الحلول الى عملوها علشان موضوع ال fading ده

    [​IMG]

    الحل الاول هو ال Microscopic Diversity Techniques

    [​IMG]
    [​IMG]

    وده عبارة عن ثلاث اقتراحات

    الاول : Time Diversity Technique

    وهوببساطة ان احنا نرسل نفس الاشارة للموبايل ولكن بزمنين مختلفين يعنى نبعت الاشارة وبعد زمن T نرسل نفس الاشارة تانى وبكدة نكون غيرنا الالمسار بتاع الاشارة صح ......لا بس استنوا ده بيعتمد ان احنا بنتعامل مع موبيل يعنى ده بيعتمد ان الموبيل ده بيتحرك فمع الاشارة الاولى هنفرض انها وصلت فى مسار خلاها ب 0 بعد زمن t بعتنا اشارة تانية هيكون الموبيل اتحرك وبكدة الاشارة التانية دى هيبقى اكيد ليها مسار تانى لان الموبيل اتحرك مش كدة .... بس هنفرض بقى ان المستخدم ده بيتكلم وهو ثابت مش بيتحرك يبقى انا بعتله اشارتين على الفاضى لانهم هيوصلوا فى نفس المار ...يبقى الاقتراح ده فاشل ...تعالوا نشوف الاقتراح التانى

    الثانى : Frequency Diversity Technique

    وفيه بيتم ارسال الاشارة بتاعتنا الى الموبيل ولكن مبتبقاش اشارة واحد لا هما فى الحقيقة اشارتين ولكن تردد الاشارة الاولى غير تردد الاشارة التانية .. طيب وهنستفاد اية ...طيب ممكن برده يكون الموبايل ثابت....ماشى طيب هو احنا كنا اتكلمنا عن الى اسمه Rayleigh ده لية
    افتكر كدة الراجل ده كان بيقول اية . كان بيقول ان احنا لو بعتنا من مرسل ثابت الى مستقبل ثابت بترددين مختلفين (يعنى الاشارتين هيسلكوا نفس المار لان المستقبل الى هو الموبايل ثابت ) هيكون ال fading مختلف..
    يبقى احنا كدة حلينا الموضوع ده كل مستخدم هياخد ترددين نبعتله فيه اشارتين وعلى اسوأ الظروف اكيد واحدة فيهم هتوصل كويسة...ثوانى كدة انت قولت اية كل مستخدم هياخد ترددين . هى ناقصة مش هينفع طبعا ده انا عندى مشكلة فى الباند بتاعى وبعانى من صغره هقوم ادى كل مستخدم ترددين ..مش هينفع برده يبقى الاقتراح ده فاشل مش هينفع

    الثالث : Space Diversity Technique

    هنا ياجماعة بنعمل اية ..احنا قولنا اننا بقسم ال cell بتاعتى الى ثلاث اقسام صح . كل قسم بيبقى فيه انتنا مخصصة ليه تمام .طيب محنا ممكن نحط فى كل قسم 2 انتنا بحيث تكون واحدة فوق وواحدة تحتحا شوية ...طيب وهو ده هيفيدنا فى اية ...لا استنا الاتنين انتنا هيبعتوا نفس الاشارة للموبايل ولان كل انتنا فى مكان متغير عن التانية يبقى كدة كل اشارة هتروح فى مسار غير الاشارة التانية ....احنا كدة حلينا المشكلة..بس فى مشكلة تانية هى التكلفة لو لاحظت احنا كدة ضاعفنا عدد الهوائيات فى كل BTS يبقى كدة التكلفة هتبقى عالية جدا ..علشان كدة احنا بنستخدم الموضوع ده فى المناطقى الى بنلاحظ ان ال fading فيها بيبقى عالى قوى ...اما اى منطقة تانية فبنستخدم تقنيات تانية....

    طيب تعالوا بقى نشوف الطرق المستخدمة فى الموبايل لاستقبال الاشارة

    [​IMG]

    الطريقة الاولى :
    Selective Technique​

    ببساطة هى اختيار الاشارة الافضل عند استقبالها وترك الاشارة الضعيفة

    الطريقة الثانية : Maximal Ratio

    هو استخدام ميكرو بروسيسور فى الموبايل ليقوم بتكبير الاشارة الضعيفة بمقدار كبير وتكبير الاشارة الاكبر بمقدار اكبر وهكذا وهذه العمليات يتحكم فيها الميكروبروسيسور. زلكنها طريقة معقدة وستكون مكلفة

    الطريقة الثالثة : The Equal Gain

    ضرب الاشارات المستقبلة فى نفس القيمة وتكبيرها جميعا دون استخدام الميكرو بروسيسور ولكن لن نستفيد شيئا بضرب الاشارات جميعها فى نفس القيمة ...

    الطريقة المستخدمة فعلا هى الطريقة الاولى



    الحل الثانى : Frequency Hopping

    [​IMG]

    اجنا قولنا يا جماعة ان بتغيير التردد يتغير ال fadingحتى لو على نفس المسار .ال Frequency Hopping هو القفز بين جميع الترددات بسرعة كبيرة وبذلك سيتغير ال fading حتى لو المستخدم ثابت .طيب هو القفز ده اد اية بالظبط ..يصل الى 217 hop/sec

    الحل الثالث : Interleaving Technique

    هو تقطيع المعلومة المرسلة الى نصفين .نصف نقوم بارساله ونقوم بارسال النصف الاخر فى الفريم الذى يليه ..وعموما سنتكلم عنها ال Interleaver فى حينه

    الحل الرابع : Adaptive Power Control

    وهو ان نقوم بزيادة ال Power للمستخدم الذى يعانى من ضعف الاشارة بسبب ال fading



    احنا كنا بنتكلم عن الحاجات الى بتواجهها الاشارة المرسلة وكان اول ححاجة اتكلمنا عنها ال Multipath Fading بانواعه ال rician وال rayleigh واتكلمنا عن الحلول بتاعتهم
    تانى حاجة هنتكلم عنها فى المشاكل الى بتواجه الاشارة هى

    Shadow Fading

    [​IMG]

    بصوا يا جماعة لو فى واحد بيتكلم فى الموبايل بتاعه وهنفرض انه عدى جمب جبل عالى بعربيته مثلا ايه الى هيحصل ..اكيد الاتصال بينه وبين ال BTS هينقطع صح..
    طب وبعدين ...ال MS بيقوم بقياس قوة الاشارة الى جياله من جميع ال BTSs الى حواليه وعلى هذا الاساس يقوم باختيار ال BTS ذات اقوى اشارة ويعمل عليها حاجة اسمها Handover ..وذلك اثناء الاتصال.. يبقى لما ال MS يلاقى قوة الاشارة فى BTS من الى حواليه اقوى من الاشارة الى جاياله من ال BTS الى موجود فى نطاقها يتم تحويله الى ال BTS الاقوى فى الاشارة وذلك عن طريق الامر الصادر من ال BSC ...والكلام ده ان شاء الله هنتكلم عليه بالتفصيل ان شاء الله ....

    تالت مشكلة

    Doppler Shift

    [​IMG]

    طبعا كلنا عارفين نظرية دوبلر ..وعموما احنا هنتكلم عنها شوية
    عمر حد فينا كان راكب عربيته او عربية ميكروباص وهو على الطريق الصحراوى ولقى ادامه لجنة بتقوله انه تجاوز السرعة القانونية .. طيب هى الناس دى عرفت ازاى ان انت ماشى على سرعة عالية ...هما عرفوا سرعتك ازاى ؟
    العالم دوبلر ده قال ان لو فى تردد بنرسله فى اتجاه معين وفى جسم بيسير بسرعة فى اتجاهنا. . التردد ده لما نستقبله هنستقبلة وهو بتردد اعلى من التردد الى ارسلناه بيه.. الفرق ده الى بين التردد المرسل والتردد المستقبل بنسميه تردد دوبلر وهو بيتناسب مع سرعة الجسم ده..

    [​IMG]

    يبقى وبحسبة صغيرة هنعرف سرعة الجسم ده لما نستقبل التردد الى احنا ارسلناه ..اما لو كان الجسم ده بيسير فى اتجاه عكس اتجاه الارسال فالتردد الى اجنا هنستقبلة هيبقى اقل من التردد الى احنا ارسلناه....
    وطبعا الموضوع ده بيحصل فى النظام بتاعنا لو ال user بيتكلم فى الموبايل وهو راكب عربية وبيمشى بسرعة كبيرة ...
    وطبعا ده هيسبب مشكلة فى الارسال والاستقبال لان ال MS وال BTS خلاص اتفقوا على التردد الى هيشتغلوا عليه. وخلاص ال MS ظبط الفلتر بتاعه على التردد ده وطبعا بسبب السرعة الى ماشى بيها ال MS التردد هيختلف وبالتالى الاشارة الى بيستقبلها ال MS هيتشال منها جزء كبير بسبب ال Band Pase Filter الى خلاص متظبط فى ال MS ...
    طيب والحل
    هنعمل Synchronization بين ال BTS وال MS
    يعنى هنعمل عملية توافق بينهم فى التردد وذلك حسب السرعة الى ماشى بيها ال MS

    المشكلة الرابعة

    Co-Channel Interference

    [​IMG]
    وهى التداخل بين ال cells التى تستخدم نفس التردد
    والحل هو عمل تقسيم لل cell زى متكلمنا قبل كدة عنه cell sectorization
    الحل التانى هى زيادة ال power المرسلة من ال BTS الى ال MS

    المشكلة الخامسة

    Adjacent Channel Interference

    [​IMG]

    ركزوا معايا يا جماعة شوية
    احنا قولنا قبل كدة ان احنا بنقسم الباند بتاعنا كله على ال cluster واتكامنا ازاى بنقسم الترددات دى على ال cells ....طيب احنا لو وزعنا الترددات بالترتيب جوه نفس ال cell
    طيب هو مش ممكن يحصل تداخل بين التردد والتردد الذى يليه ....ايه ده ازاى يا عم هيحصل تداخل بينهم هما مش ترددين مختلفين؟؟ والتداخل بيحصل بين نفس التردد لو استخدمناه مرتين؟؟
    ماشى بس احنا عارفين ان احنا بنستخدم band pase filter فى ال Ms
    طيب مهو الفلتر ده مش Idle صح يعنى هيبقى فى تشويش لو استخدمنا ترددين متتاليين داخل نفس ال cell ..طيب والحل ممكن واحد يقول طيب محنا ممكن نخلى فيه منطقة فارغة بين كل تردد والذى يليه...تمام صح بس ده هيأثر على الباند بتاعى ولو جمعنا الفروق الى احنا هنسيبها بين كل تردد والتانى هنلاقى ان احنا سيبنا جزء كبير احنا فى احتياج اليه..
    طيب الحل اية بقى ....

    [​IMG]

    الحل بسيط جدا وهو وعند توزيع الترددات على ال cell هنراعى اننا منخليش ترددين متتاليين فى نفس ال cell وده بنسميه Channel Management

    المشكلة السادسة

    Delay Spread OR Time Dispersion

    [​IMG]

    هو مش ممكن يا جماعة يحصل تأخير فى الاشارة المرسلة لانها عدت على مسار كبير وممكن يكون فى اشارة تانية واصلة بدرى شوية وبالتالى عند جمعهم تحصل مشكلة ..على فكرة التاخير ممكن يكون مش كبير ولا حاجة ممكن يكون التأخير بمقدار bit واحدة بس وعند الجمع طبعا هتحصل مشكلة فى الاشارة بالكامل بسبب ال bit دى

    الحل استخدام ال Delay Equalizer وهو ان احنا نبعت مع الاشارة بتاعتنا شوية bits يعرفونا الترتيب بتاع ال bits الى فى الاشارة وهنسميهم Training Sequance
    طيب بنضفهم امتا وازاى ان شاء الله هنشوف الموضوع ده بالتفصيل

    المشكلة السابعة

    Distance Between MS and BTS

    [​IMG]

    طبعا فى موبيلات قريبة من ال BTS واخرى بعيدة عنها واحنا قولنا ان احنا هنعملهم Power Control ونبعت للموبيلات القريبة Power قليلة وهنبعت للموبيلات البعيدة Power اكبر يعنى بنظبط ال Power حسب المسافة بين ال MS وال BTS
    بس المشكلة المرة دى مش فى ال Power المرسلة طيب هى المشكلة فى اية ...
    المشكلة فى الوقت الى هتتبعت فيه الاشارة للموبيل ورد الموبيل باشارة تانية
    هنفرض ان الموبيل A والموبيل B بيتكلموا فى نفس اللحظة على نفس ال BTS
    وتم تخصيص ال Time Slote الى اسمه T2 للموبيل A
    وتم تخصيص ال Time Slote الى اسمه T3 للموبيل B
    وتم ارسال ال Frame
    فى اثناء الاستقبال ونظرا لقرب الموبيل B هنفرض ان مفيش تأخير فى الرد
    ونظرا لبعد الموبيل A الاشارة هتاخد وقت لغاية لما توصل لل BTS الوقت مش طويل ولا حاجة لكن كفاية اننا نعرف ان وقت ال TS يساوى 0.577 msec
    يعنى حوالى نص ملى ثانية معنى كدة ان اى تأخير فى اى TS هيأثر على ال TS الى بعده
    يعنى ولبعد المسافة بين الموبيل A وال BTS الرد بتاع الموبيل A هيوصل متأخر وبكدة هيدخل على الزمن بتاع الموبيل B وهتبقى مشكلة
    طيب والحل اية
    الحل هو وبمعرفة المسافة بين ال MS وال BTS بواسطة الحسابات بواسطة ال BTS
    هنعرف الوقت الى هتاخده الاشارة مت والى ال BTS وهنا تقوم ال BTS بابلاغ ال MS انه يقوم بارسال الاشارة الخاصة به بدرى شوية بمقدار الزمن
    المستغرق لوصول الاشارة الى ال BTS

    المشكلة الثامنة

    Path Loss


    [​IMG]


    طبعا يا جماعة احنا عارفي ان الاشارة اللاسلكية بتتأثر بعوامل الجو
    يعنى لو فى جو ممطر غير لو الجو كويس وبكدة هتفرق معايا حاجة مهمة وهى المسافة الى بتوصل اليها الاشارة ودى طبعا بتتناسب طرديا مع ال Power المرسلة ..المشكلة هنا هى اننا وفى حالة الجو الغير مستقر الاشارة بتاعتنا هتتأثر جدا بحالة الجو دى وممكن توصل للمتخدم مشوهة او ممكن متوصلش خالص
    طيب والحل
    الحل بسيط جدا وهو عن طريق زيادة ال Power المرسلة من ال BTS فى حالات الجو السىء ..وتقليلها فى حالات الجو الصحو.
    طيب وده بيحصل ازاى...
    جميع ال BTSs المجاورة لبعضها تقوم بقياس ال Power المرسلة من بعضها البعض والتحكم فى قدرة ال Power المرسل بحيث لاتكون هناك منطقة بها Power قليلة ...

    طيب تعالوا بقى نشوف ال Noise الموءثرة على الاشارة فى رسم واحد


    [​IMG]

    دى جميع الموءثرات التى تتأثر بها الاشارة المرسلة


    وبكدة يا جماعة نكون خلصنا CH 1
    وقبل مانبدأ فى CH 2 لو فى اى حد عنده اسئلة انا جاهز ان شاءالله
     
    أعجب بهذه المشاركة محمد أمين أبو مريم
  5. sharif_soper1

    sharif_soper1 New Member

    إنضم إلينا في:
    ‏أكتوبر 20, 2007
    المشاركات:
    7
    الإعجابات المتلقاة:
    0
    نقاط الجوائز:
    0
    السلام عليكم رائع اخي رائع استمر في المشوار
     
  6. pulsar

    pulsar New Member

    إنضم إلينا في:
    ‏ديسمبر 24, 2007
    المشاركات:
    7
    الإعجابات المتلقاة:
    0
    نقاط الجوائز:
    0
    تحياتي للجميع
     
  7. raul_ess

    raul_ess Guest

    مشكور أخي العزيز :):):)
     
  8. titoking

    titoking New Member

    إنضم إلينا في:
    ‏مارس 26, 2008
    المشاركات:
    4
    الإعجابات المتلقاة:
    0
    نقاط الجوائز:
    0
    باسم جميع مهندسى الاتصالات نشكرك على هذا الموضوع الجميل جدا جدا

    اشكرك جزيرا على هذا المجهود الرائع ويارب يجعلوا فى ميزان حسناتك

    بجد الموضوع جميل جدا وارجوا انك تكمل الكورس

    وتخش فى الكورسات التانية النتا وعدتنا بيها ارجو انك تهتم براى:clap:
     
  9. titoking

    titoking New Member

    إنضم إلينا في:
    ‏مارس 26, 2008
    المشاركات:
    4
    الإعجابات المتلقاة:
    0
    نقاط الجوائز:
    0
    بعد ازنك كمل الموضوع ارجو انك تكمل الموضوع

    ارجوا انك تكمل الموضوع البدات فيه لانه بجد مفيد وانا فهمت من الاسلوب بتاعك

    انا اتمنى انك ما تعملش اول درس و تسكت على كده ارجوا انك تكمل

    وجزالك الله كل خيير

    ارجوا ان تكتب ايميلك عشان لو حبينا نسال او يبقى فى اتصال

    ارجوا انك تنزل الدرس التانى غدا :clap:
     
  10. ENGSERAG

    ENGSERAG New Member

    إنضم إلينا في:
    ‏مارس 25, 2008
    المشاركات:
    8
    الإعجابات المتلقاة:
    2
    نقاط الجوائز:
    0
    بارك الله فيك يا اخي و ربي يوفقك :)
     
  11. bossnemo

    bossnemo Member

    إنضم إلينا في:
    ‏ديسمبر 22, 2007
    المشاركات:
    32
    الإعجابات المتلقاة:
    24
    نقاط الجوائز:
    8
    اسف جدا يا جماعة على التأخير بس والله لظروف خارجة عن ارادتى وان شاء الله الكورس هيكمل ...
    ومشكور جدا للجميع على الردود الجميلة دى وان شاء الله الى عنده سؤال انا موجود وان شاء الله مستعد للأجابة ..
    بكرة ان شاء الله هتنزل اول محاضرة فى شبتر 2 ​
     
  12. bossnemo

    bossnemo Member

    إنضم إلينا في:
    ‏ديسمبر 22, 2007
    المشاركات:
    32
    الإعجابات المتلقاة:
    24
    نقاط الجوائز:
    8
    [​IMG]

    تعالوا بقى نشوف النظام بتاع ال GSM بيتكون من اية

    [​IMG]

    ده شكل عام لمكونات النظام تعالوا بقى نشوف المكونات دى حاجة حاجة
    وعلى فكرة انا مش عاوز حد يتوه لما يبص للرسمة الى فق دى . الموضوع بسيط جدا جدا ان شاء الله . بس خليكوا معايا فى جزء جزء هشرحه . وبعد كده هنربط الاجزاء كلها ببعض .

    اولا : Mobile Station MS

    [​IMG]

    والموبايل زى محنا عارفين بيتكون من العدة بتاعتنا والشريحة

    [​IMG]

    طيب متيجو نتكلم عن الموبايل الاول . وهنا احنا هنتكلم عن الحالات الى بيكون فيها الموبيل

    [​IMG]

    تعالوا كدة نشرحهم واحدة واحدة ..

    اولا : هنتكلم عن الموبيل وهو مفتوح attached

    ودى فيها حالتين اولا : والموبيل مفتوح وبس يعنى وهو فى جيبك ideal
    1 - registration
    وهنا احنا لسة بنفتح الموبيل. بعد فتحه مباشرة هيبعت اشارة
    لل BTS يقولها انه فتح وهيبتدى يستخدم الشبكة يعنى هيعمل
    registration وهنشوف دى بتم ازاى بالتفصيل ادام شوية
    ان شاء الله ..
    2 - Location Area LA
    احنا بنقسم الشبكة الى عدة مناطق بنسميها ال
    Location Area وده للتسهيل على الشبكة فى البحث
    عن اى موبيل جاياله مكالمة .
    وبالتالى ال MS كل لما يخرج من LA الى LA تانى
    بيبعت للشبكة وبيبلغها انه دخل فى نطاق LA تانى علشان
    الشبكة تبقى عارفة هو فين لما يجيله مكالمة ومتعدش تدور
    عليه فى الجمهورية كلها وتضيع وقت كبير فى البحث .
    وطبعا اللمكان ده بيتخزن فى الشبكة . وان شاء الله هنقول
    بيتخزن فين والموبيل بيبلغ الشبكة ازاى انه خرج من ال
    LA الى كان فيه الى LA اخر ..
    3 - paging
    احنا قولنا يا جماعة من شوية ان ال MS لما بيخرج من
    LA الى LA اخر بيبلغ الشبكة هو بقى فين ..
    لما ال MS ده بقى يجيله مكالمة الشبكة هتعمل اية ..
    طبعا خلاص بقى مهى الشبكة عارفة هو فين خلاص
    صح ؟ تمام بس الشبة عارفة هو فى اى LA وال LA
    ده بيتكون من كذا CEll طيب هى الشبكة هتعمل اية
    الشبكة هنا هتعمل paging يعنى هتدور على ال
    MS ده فى ال LA الى عارفة انه موجود فيه .
    4 - roaming
    وهى التجوال . يعنى لو اخنا مشغلين التجوال ودخلنا فى
    نطاق اى شبكة محمول تانية هنضطر نقفل الموبيل ونشغله
    علشان يعمل registration على الشبكة الجديدة .
    تانيا : ان الموبيل وبيجرى مكالمة active

    1 - Ongoing call
    يعنى ال MS فعلا بيجرى مكالمة
    2 - HO
    ال Ms وهو بيجرى مكالمة مش ممكن يخرج من نطاق
    تغطية ال BTS الى نطاق تغطية BTS اخرى .
    فى الحالة دى هيعمل حاجة اسمها Hand Over
    يعنى الشبكة بتنقل ال MS من ال Cell الى هو موجود فيها
    وبيجرى المكالمة الى Cell اخرى وده طبعا بيتم بحيث
    المكالمة متتقطعش .وده بيحصل بعد شوية حسابات بتحصل
    فى ال MS و ال BTS وهنتكلم عنها بالتفصيل فى
    وقتها ان شاء الله .

    3 - Monitoring power & quality of its BTS
    ال MS وهو بيجرى المكالمة بيفضل يقيس ال Power
    الى جاياله من ال BTS بتاعته ويبعت ريبورتات الى
    ال BSC التابع له وده طبعا عن طريق ال BTS
    طيب هو ليه بيقيس ال Power ديه
    علشان لو ال Power دى قلت عن حد معين يقوم ال
    BSC بالبدأ فى عملية ال Hand Over
    وكمان علشان موضوع ال Power Control
    الى اتكلمنا عنه فى الشبتر الى فات...
    4 - Monitoring power of neighboring BTSs
    الموبايل اثناء المكالمة بيفضل يقيس ال Signals
    الى جاياله من جميع ال BTS's الى حواليه وده بيتم
    كل 480 ملى ثانية وبتتبعت برده لل BSC

    ثانيا : هنتكلم عن الموبيل وهو مقفول detached
    1 - IMSI de.
    وهنا يعنى انت الى قفلت التليفون بنفسك او التليفون نفسة خرج بره التغطية وهنا ال MS قبل مايقفل بيبعت اشارة الى الشبكة انه قد تم اغلاقة او انه خرج عن حدود التغطية وبالتالى يتم تسجيله فى الشبكة مغلق او غير متاح ..
    2 - Implicit de.
    وهنا فى حالتين اما ان الموبيل يخرج عن حدود التغطية او ان البطارية تفصل شحن
    وهنا فى الحالتين بيبقى فى مشكلة فى الشبكة ..لان ال MS فصل قبل مايبلغ الشبكة انه اتقفل طيب الشبكة تعمل اية .. فى حاجة اسمها ال Periodic Registration وهى ان تقوم الشبكة بارسال اشارة الى جميع ال MS's كل ست دقائق . الموبيل الى يرد يبقى تمام والموبيل الى ميردش يتم تسجيله مغلق....

    [​IMG]

    طيب احنا اتكلمنا عن حالات الموبيل سواء ان كان مفتوح او مقفول طيب هو الموبيل ده مش ليه رقم بيميزه عن غيره من الموبيلات يعنى رقم لكل عدة والرقم ده بنسميه IMEI
    Interntional Mobile Equipment Identity

    [​IMG]

    وزى محنا شايفين فى الصورة الى فوق الرقم ده بيتكون من 15 digit
    ولو شفناه من الشمال لليمين هنلاقى ان اول مجوعة عبارة رقم يدل على عن الموديل والشركة المصنعة .
    وتانى رقمين يدل على بلد المنشأ
    وتالت مجموعة من الارقام هما السيريال نمبر الى بيفرقوا بين الاجهزة الى ليها نفس الموديل والشركة والبلد
    واخر رقم ده بيبقى Spare وهو مختلف بين الشركات
    وطبعا ال IMEI ده ثابت للجهاز الا اذا تم تغييره عن طريق شارع عبد العزيز..

    ثانيا : Subscriber Identity Module SIM

    [​IMG]

    طبعا كلنا عارفين الشريحة الى بنركبها فى الموبيل بتاعنا علشان نعرف نتصل او نستقبل المكالمات وغيره طيب هى الشريحة دى فيها ايه علشان تعرف تعمل ده كله ..
    الشريحة دى فيها شوية ارقام هنعرفها دلوقتى وفيها القيمة بتاعة الشحن بتاعنا وفيها خوارزميات التشفير والتوثيق وهنعرفهم كلهم وهنعرف بيشتغلوا ازاى ان شاء الله ..

    [​IMG]

    تعالوا بقى نشوف الارقام الى بيتعامل بيها الموبيل مع الشبكة واماكن وجودها او اماكن واوقات توليدها

    [​IMG]

    اول رقم ال MSISDN

    [​IMG]

    وده يا جماعة وببساطة الرقم الى كلنا بنتصل بيه وبنتعامل بيه مع بعض ..
    وهو بيتكون من 15 digit
    اول اتنين من على الشمال دول الكود الدولى الى بيبقى +
    تانى مجموعة هو كود الدول وبيبقى 20 فة مصر
    تالت مجموعة هو رقم الشبكة الداخلية يعنى هيبقى 010 لفودافون و011 لاتصالات وهكذا
    والصفر الى فى الاول ده اشارة لاننا هنكلم موبيل
    رابع مجمدوعة هو رقم الشريحة نفسها وهو يتكون من 7 digit
    وال MSISDN ده بيبقى متخزن على الشريحة وموجود فى الشبكة .

    تانى رقم هو ال IMSI

    [​IMG]

    وده بقى الرقم الى الشبكة بتتعامل بيه مع ال MS
    اول مجموعة من الشمال هى كود الدولة من جهة نظر شركات المحمول
    تانى مجموعة هى رقم شركة المحمول حسب بداية تواجدها فى البلد
    تالت مجموعة هو رقم يتم التفريق به بين ال MS's وبعضها وهو لايتكرر نهائيا
    وال IMSI ده بيكون موجود على الشريحة وموجود فى الشبكة وشوية وهنعرف بيبقى موجود فين بالظبط ..والشبكة بتستخدمه ازاى

    تالت رقم هو ال IMEI
    وده اتكلمنا عليه قبل كدة

    رابع رقم هو ال MSRN

    [​IMG]

    اول تلات مجاميع زى ال MSISDN
    والمجموعة الاخيرة هى رقم ال Location Area الموجود فيها ال MS
    والرقم ده بيبقى متخزن فى الشبكة

    خامس رقم هو ال TMSI

    [​IMG]

    وزى محنا شايفين كدة الرقم ده عبارة عن مجموعة واحدة
    احنا قولنا ان الشبكة بتتعامل مع الموبيل عن طريق الرقم IMSI
    لكن الرقم ده سرى جدا ولا يسمح التعامل به .
    ال TMSI ده هو الرقم البديل .يعنى اول الموبيل ما يتم فتحه بيبعت ال IMSI وبعد كدة الشبكة تخصص ليه TMSI خاص به يتم التعامل بينها وبينه طوال فترة فتح الموبيل ولا يتم تغييره الا عند غلق الموبيل وفتحه مرة اخرى او عند خروج الموبيل من LA الى LA اخر
    او بعد مرور وقت معين من استعمال ال TMSI ده ...

    بكدة هنتكلم المرة الجاية ان شاء الله عن ال Base Station Subsystem BSS
    وهو يتكون من
    1 - Base Transceiver Station BTS
    2 - Base Station Controler BSC
    3 - Transcoding and Rate Adaptation Unit TRAU
     
    أعجب بهذه المشاركة محمد أمين أبو مريم
  13. bossnemo

    bossnemo Member

    إنضم إلينا في:
    ‏ديسمبر 22, 2007
    المشاركات:
    32
    الإعجابات المتلقاة:
    24
    نقاط الجوائز:
    8
    ان شاء الله هنتكلم عن ال Base Station Subsystem BSS

    [​IMG]

    1 - Base Transceiver Station BTS

    [​IMG]

    وهى البرج الى احنا كلنا بنشوفه فوق العمارات والبيوت وبيكون عليها الانتنا او التلاته انتنا وانتنة ال Microwave الى بتقوم بربط ال BTS مع ال BSC ودى لازم تكون Line Of Site يعنى لازم الاتنين انتنا يكونوا شايفين بعض علشان ده بيبقى بنسل بيم
    وكل Cell يحتوى على BTS واحدة فقط
    وهى المسئولة ع جميع العمليات الى بتحصل فى الاشارة م تشفير وتحميل وغيره
    لكنها بتعمل الحاجات دى كلها عن طريق الاوامر الى جايالها من ال BSC يعنى هو المخ وهى العضلات ..

    [​IMG]

    وده شكل الشلتر بتاع ال BTS وبيبقى موجود فى الغرفة السفلية الموجودة اسفل البرج وكما بيبقى موجود فيها الاجهزة الى بتتحكم فى الميكروويف وبيبقى موجود فيها برده اجهزة اطفاء وبطاريات تخليها ممكن تشتغل لمدة م اربع الى تمن ساعات فى حالة انقطاع التيار الكهربائى

    2 - Base Station Controler BSC

    [​IMG]

    ال BSC ده يا جماعة هو المسئول عن جميع العمليات الى بتعملها ال BTS من Power Control او ال H.O وغيرها من العمليات يعنى هو الى بياخد القرار بتاع العمليات دى وال BTS عليها التنفيذ ..العمليات دى زى:

    1- Paging
    لو فى مكالمة جاية ل MS ال BSC بيبعت رسالة الى جميع ال BTS's بالرقم MSRN الخاص بال MS فتقوم جميع ال BTS;s التابعة لهذا ال BSC بالبحث عن هذا ال MS
    والعملية دى بنسميها Paging .واول لما اى BTS فيهم تلاقى ال MS المطلوب بتبعت لل BSC رسالة انها لقيته فيقوم ال BSC بوقف عملية ال Paging ...وعلى فكرة عملية ال Paging دى بتحصل داخل ال LA بالكامل لان مكان ال MS المتخزن فى الشبكة هو رقم ال LA الموجود فيه ....

    2 - Channel Allocation

    يعنى وبأختصار تحديد التردد وال T.S الى هيشتغل عليه ال MS سواء لو هيبدأمكالمة او هيستقبل مكالمة

    3 - Handover

    اثناء المكالمة بيبقى فى مراقبة لقوة الاشارة بين ال MS وال BTS ولو الاشارةقلت عن حد معين بيقوم ال BSC بعمل Handover لل MS على BTS تانية تكون ال اشارة بتاعتها اقوى ....

    4 - Frequency Hopping

    طبعا احنا عارفين الخاصية دى واتكلمنا عليها قبل كدة .المسؤل عنها بقى هو ال BSC

    [​IMG]
    ويتحكم ال BSC فى حوالى من 20 الى 30 BTS
    ال BٍSC بيتصل بال Remote BTSالتابعة له بالميكروويف وبيبقى موجود معاه BTS بنسميها Co-located BTS وبيبقوا موجودين فى سنترال ارضى علشان كدة لو لاحظنا هنلاقى ال BTS دى مليانا بانتنات الميكروويف الى هية عاملة زى الطبلة دى وده علشان ال BSC ده بيتصل بكتير من ال BTS وكل واحدة ليها انتنا ميكروويف خاصة بها

    [​IMG]

    وده شكل الشلتر بتاع ال BSC

    طيب احنا قولنا ان ال BSC بيتحكم فى عدد من ال BTS's طيب هو التوصيل او الربط بين ال BSC وال BTS's دى بيبقى ازاى ..

    1 - Cascade

    [​IMG]

    زى محنا شايفين التوصيل بيبقى فى اتجاه واحد وطبعا هيبقى فى مشكلة . وهى ان لو فى اى BTS وقعت المجموعة بالكامل هتقع ...يبقى مش هينفع نوصلهم مع بعض بالطريقة دى

    2 - loop

    [​IMG]

    ودى الطريقة التانية للتوصيل ..هى ممكن تكون كويسة شوية بس لو حصل قطع فى 2 BTS
    مرة واحدة يبقى المجموعة بالكامل هتقع ..ومتنساش ان فى مجموعة مش صغيرة من ال BTS's يعنى احتمال ان اكتر من BTS تقع موجود....

    3 - Star

    [​IMG]

    ودى بقى احسن طريقة للتوصيل بين المجموعة بالكامل ..كل BTS متوصلة مع نفسها بال BSC يعنى لو حصل مشكلة فى اى BTS المجموعة مش هتتأثر .......
    والربط بين ال BSC وال BTS's بيكون عن طريق ال Microwave عادة
    ولكن فى المسافات القريبة ممكن نستخدم ال Optical

    3 - Transcoding and Rate Adaptation Unit TRAU

    [​IMG]

    بصوا يا جماعة احنا طبعا عارفين ان نظام ال GSM مش نظام مستقل بذاته لكن هو نظام بيعتمد على الشبكة الارضية ...التوصيل بين ال MSC وال BSC بكابلات الشبكة الارضية ..
    لكل مستخدم Rate 64 kbps بيخرجوا من ال MSC وعلشان نوصلهم الى ال BSC الى بعد كدة هيبعتهم الى ال BTS وطبعا 64 kpbs دول كتير اوى وهياخدوا B.W كبير اوى لو اتنقلوا زى مهما كدة ...يبقى لازم نحول ال Data Rate الكبير ده الى Data Rate صغير بقدر الامكان علشان يوفرلى ال B.W بتاعتى....وهى دى بق مهمة ال TRAU
    بيحول ال 64 kbps الى 16 kbps وكمان بيعملهم عملية Multiplexing
    يعنى بيخلى كل 4 مستخدمين على كابل واحد ويبعتهم لل BSC ...هو فى الاصل بيحولهم الى 13 kbps وبيضيف ليهم 3 bit Control لتعريف كل مستخدم عن الاخر وبيتم معرفتهم فى ال BTS وهى الى بتشيلهم بعد كدة وتبعت ال 13 kbps لل MS's

    [​IMG]

    وده شكل وحدة ال TRAU

    وان شاء الله المرة الى جاية نكمل ..
     
    أعجب بهذه المشاركة محمد أمين أبو مريم
  14. magdy mohamed

    magdy mohamed New Member

    إنضم إلينا في:
    ‏ديسمبر 10, 2007
    المشاركات:
    15
    الإعجابات المتلقاة:
    0
    نقاط الجوائز:
    0


    شكرا لك عزيزي
     
  15. abdoud

    abdoud New Member

    إنضم إلينا في:
    ‏يناير 4, 2007
    المشاركات:
    4,352
    الإعجابات المتلقاة:
    1,502
    نقاط الجوائز:
    0
    مكان الإقامة:
    الـجــamourــmonـــزائر


    شكرا
    [​IMG]
     
  16. abdoud

    abdoud New Member

    إنضم إلينا في:
    ‏يناير 4, 2007
    المشاركات:
    4,352
    الإعجابات المتلقاة:
    1,502
    نقاط الجوائز:
    0
    مكان الإقامة:
    الـجــamourــmonـــزائر


    [​IMG]
     
  17. titoking

    titoking New Member

    إنضم إلينا في:
    ‏مارس 26, 2008
    المشاركات:
    4
    الإعجابات المتلقاة:
    0
    نقاط الجوائز:
    0


    الله يفتح عليك بجد الكورس جميل جدا جدا جدا والطريقة جميله فى الشرح ومثالية جدا
    بجد شغل زى الفل واحسن كورس شفته فى حيااتى لشرح gsm
     
  18. baker84

    baker84 New Member

    إنضم إلينا في:
    ‏ابريل 7, 2008
    المشاركات:
    3
    الإعجابات المتلقاة:
    4
    نقاط الجوائز:
    0


    السلام عليكم
    بارك الله فيك أخي على الدرس واستفدنا منه لكن عندي ملاحظة واتمنى ان تتقبلها وهي ان يكون الدرس بللغة العربية الفصحى بدل اللهجة الدارجة وشكرا لك
     
  19. en.bahaa

    en.bahaa New Member

    إنضم إلينا في:
    ‏ابريل 11, 2008
    المشاركات:
    1
    الإعجابات المتلقاة:
    0
    نقاط الجوائز:
    0


    كل الشكر والتقدير لمجهودك
    مستنين على احر من الجمر(wasntme)
     
  20. م. أيهم

    م. أيهم New Member

    إنضم إلينا في:
    ‏يناير 27, 2008
    المشاركات:
    170
    الإعجابات المتلقاة:
    21
    نقاط الجوائز:
    0


    مشكوووووووووووووووووووووووووووووووووووووووووور أخي ..

    الدورة فوق من رائعة و مبسطة ، بارك الله فيك على مشاركتك بها و نتمنى أن تستمر فيها و في بقيه الدورات التي و عدتنا بها ..
     

مشاركة هذه الصفحة