هندسة صناعية مشروع تصنيع الفنيك المطهر من الألف إلى الياء كأنك تراه ...........

[ممدوح الجيار]

بالنسبة لشراء الخامات اللازمة للتصنيع :
فيه خامات هنجيبها من شركة الكوك
وده موقعهم على الإنترنت​

http://www.nasr-coke.com.eg/



وتليفونات الشركة هى : 0225011375 _ 0225011564
وتليفون رئيس جهاز قطاع المبيعات : 0225011402


والشركة ليها مكاتب :


مكتب فى القاهرة 16 شارع شريف _ الدور الرابع
ت: 0223921731 _ 0223924189
فاكس : 0223916939


مكتب الأسكندرية 16 شارع صلاح سالم ت : 034836805 _ 034801171 _ فاكس : 034865604



والخامات اللى هنحتاجها من الشركة هى :
1 _ قطفة الفينول
2 _ زيت الكريزوت
وحاجة ثالثة بنجبها من هناك بس مش بنجبها إلا لما يكون مفيش قطفة فى الشركة لإن ساعات بيبقى فيه أيام فى السنة بيبقى مفيش قطفة فى الشركة فبنجيب خامة تانية مع الكريزوت اسمها زيت نفتلين ونصنع منها القطفة وهنبقى نتكلم عن القطفة المصنعة بالتفصيل والمواد الداخلة فى تصنيعها
فالخامات دية اللى احنا قلنا عليها ( قطفة الفينول _ زيت الكريزوت _ زيت النفتالين )
فالنفتالين والفينولات وزيوت الكريزوت المنتجات دية ومنتجات وزيوت أخرى بتبقى ناتجة عن تقطير قطران الفحم الحجرى فى درجات حرارة عالية
فالقطران ده بيطلع منه كمية مواد بيطلع منه حوالى 15 مادة والقطران ده اللى احنا قلنا عليه اللى هو بيبقى ناتج عن تقطير فحم الكوك والقطران فى الحقيقة مخلوط من أكثر من 200 مركب كيماوى وكل مادة بتطلع من القطران بيسموها باسم أعلى نوع فيها من المواد الداخلة فيها
فمثلا قطفة الفينول اللى احنا هنجيبها من الشركة أعلى حاجة فيها ايه الفينول علشان كده سموها قطفة فينول أنما هى فيها كذا حاجة فيها بتاع 7 أو 8 حاجات
والقطفة دية عبارة عن هقولك زمان كنا بناخد حاجة اسمها نظرية التقطير الإتلافى للفحم الحجرى لما كنا بنجيب الفحم الحجرى فى المعمل ونولع عليه يطلع منه غاز اسمه غاز الميثان وغاز الميثان مصاحب لمادة اسمها القطران زى البترول بالضبط
فياخدها يعملها عملية تقطير زى البترول نفس الفكرة بالضبط ويطلع منها عدة منتجات أعلاها الفينول وحاجة اسمها نفتلين وحاجة اسمها كريزوت وكذا مواد كيميائية أخرى بتبقى عايزة مصانع خاصة انها تشتغل فيها يطلعوا منها الفينول لوحده ويطلعوا حاجات تانية كتيرة بقى شغلانة ثانية مش تبعنا
وعلى فكرة نسبة الفينول اللى فى القطفة لا تقل عن 25 % ولذلك هى غنية بالفينول + المواد الكيميائية الآخرى
فالقطفة بتاعة الشركة فيها فينول وهو المادة الفعالة فى القطفة وفيها كريزوت وفيها نفتلين وفيها كذا حاجة فيها مواد كثير سامة تقضى على الجراثيم والميكروبات ولذلك القطفة هى المادة المطهرة فى الفنيك

​

 

[ممدوح الجيار]

وبالنسبة لزيت الكريزوت
احنا قلنا كل المواد دية بتطلع من تقطير قطران الفحم الحجرى
ولو دخلت على موقع الشركة وضغطت على كلمة المنتجات والخدمات اللى فى أعلى الصفحة هتعرف المنتجات اللى بتطلع من تقطير القطران عامة واللى بتكون منتج نهائى صالح للبيع
وهتلاقى المواد الداخلة فى تركيب زيت الكريزوت
وبالنسبة لزيت النفتالين
بيبقى عبارة عن القطفة كلها اللى بتطلع من تقطير القطران بتبقى كلها نفتلين بتبقى حوالى 90% أو 95% نسبة النفتالين فيها ويخش عمود من عمود التقطير يطلع النفتلين ده اللى هو الخام اللى هو عبارة عن زيت نفتالين
وطبعا احنا مش بنجيب النفتالين المتبلور لإن المتبلور ده اللى هو النفتلين البلى بيبقى مر بكذا مرحلة لإن ده لو استخدمناه ممكن يرسب تحت فى قلب القطفة اللى هنصنعها لإن ده متبلور مر بكذا مرحلة اما احنا بنجيب الزيت لإنه بيدوب بسرعة فميرسبش معانا بس لازم برده ندوبه كويس علشان ميرسبش برده فى قلب القطفة المصنعة
وطبعا زيت النفتلين زى ما قلنا ان احنا مش بنجيبه إلا لما يكون مفيش قطفة فى الشركة لإن ساعات بيبقى فيه أيام فى السنة بيبقى مفيش قطفة فى الشركة فبنجيب زيت النفتلين مع الكريزوت ونجيب فينول من برة من اى شركة كيماويات ونصنع احنا القطفة وهنبقى نتكلم عن القطفة المصنعة بالتفصيل والمواد الداخلة فى تصنيعها

​

 

[ممدوح الجيار]

يبقى اذن هنجيب من الشركة حاجتين :
1 _ قطفة فينول
2 _ زيت الكريزوت
والحاجات دية كلها على مستوى الشرق الأوسط مش موجودة غير فى شركة الكوك فالشرق الأوسط كله مفهوش غير شركة الكوك هو ده المصنع الوحيد اللى فى مصر وفى الشرق الأوسط اللى شغال فى تقطير الفحم ( بينتج فحم ) وده على حسب ما سمعت والله أعلم
أما فى دول أجنبية كتير هتلاقى فيها الكلام ده روسيا فيها _ بولندا فيها الدول اللى هى عندها مصانع تقطير الفحم ( بتنتج فحم ) فتلاقى عندها الحاجات دية
وعامة لو واحد فى دولة عربية وعاوز يعمل الموضوع ده ( تصنيع الفنيك ) ممكن يتصل بشركة الكوك ويشوف ممكن يكون عنده فى بلده مستوردين من شركة الكوك فممكن يتصل بشركة الكوك ويشوف ممكن يدلوه على مستوردين عنده ولا حاجة ياخد منهم خامات الفنيك اللى بتيجى من شركة الكوك .​

 

[ممدوح الجيار]

يبقى اللى احنا قلنا عليه هنجيبه من شركة الكوك حاجتين :
1 _ قطفة فينول
2 _ زيت كريزوت

طيب هنجيب أد إيه وإيه الإجراءات اللى هنعملها علشان نصرف الخامتين دول من الشركة

الأصل إنهم مبيدوش خامات إلا للى معاه بطاقة ضريبية ومعاه سجل صناعى
فمعاك سجل صناعى تصرف رسمى من الشركة وبالسعر الرسمى اللى بتطلع بيه الشركة

فخامة زى قطفة الفينول مبتطلعش رسمى من الشركة إلا بالسجل الصناعى

فإنتا لو معاك سجل صناعى بيبقى معمولك دفتر هناك عندهم صفحة ليك عندهم مثبت فيها رقم السجل بتاعك وكل حاجة لإنك بتودى هناك السجل التجارى بتاعك وصورة من البطاقة الضريبية والسجل الصناعى والحاجات دية كلها بحيث انها تتثبت أرقامها على الكمبيوتر عندهم يعنى تتسجل عند جهاز المبيعات بحيث إن يبقى ليك حصة خامات على طول عندهم مع كل إنتاج
فكل سجل صناعى بيبقى ليه حصة هناك فى الشركة

ولكن أبشر معظم الشركات اللى شغالة فى مجالنا ده مش عاملة سجل صناعى 80 % من الشركات بتصرف قطفة الفينول من الشركة ومعهاش سجل صناعى
إذن هناك بدائل للسجل الصناعى هنتكلم على الموضوع ده بالتفصيل إن شاء الله تعالى

أما بالنسبة للكريزوت
فإنتا بتجيب البطاقة الضريبية بتاعتك عادى بس أهم حاجة تبقى ضايف فيها زى ما قلتلك قبل كده كلمة وتصنيع منظفات صناعية أو تعبئة منظفات صناعية ودية سهلة عادى مفهاش مشاكل سواء كنت عامل بطاقة جديدة من الأول أو انتا فاتح نشاط تانى خالص غير النشاط بتاعنا ده وبعدين لما جيت تشتغل فى مشروعنا ده فاحتاجوا منك البطاقة الضريبية بالنشاط الجديد فبدل اما تطلع بطاقة جديدة لأ فى بطاقتك القديمة بس ضيف بس كلمة وتصنيع منظفات صناعية
فهتجيب معاك صورة الإقرار الضريبى اللى مثبت فيه المنظفات طالما مكتوب فيه الكلام ده يبقى هتجيب معاك أصل الإقرار الضريبى وصورة منه والبطاقة الضريبية وصورة منها وتثبتها هناك فى الشركة عند وحدة جهاز المبيعات على أساس إنك تصرف بيها كريزوت من الشركة رسمى بالسعر الرسمى للشركة اللى بيطلع بيه​

 

[ممدوح الجيار]

يبقى زى ما قلنا إن علشان تصرف قطفة فينول من الشركة فيه بدائل للسجل الصناعى زى ما قلتلك لإن معظم الشركات زى ما قلتلك مش عاملة سجل صناعى فبتاخد قطفة فينول بنفس الطريقة اللى هقلك عليها دلوقتى :
العمال اللى هناك فى شركة الكوك اللى شغالين فى جهاز المبيعات واللى شغالين فى وحدة الفنيك ووحدة القطران بيبقى معاهم تفويضات من شركات كثيرة معاها سجل صناعى ومش شغالة فى الفنيك أو شغالة فى الفنيك وعندها وفر فى الخامات فمش محتاجة الحصص بتاعتها لإن شركة الكوك بتطلع كميات كبيرة من الخامات فى حصص كل الشركات اللى بتتعامل مع شركة الكوك من زمان بالسجلات الصناعية فبيبقى زى ما قلتلك يا إما عندهم وفر فى الخامات فمش محتاجين الحصص بتاعتهم يا إما مش شغالين فى المجال ده وعامل سجل صناعى للتجارة بيه
المهم العمال اللى شغالين فى الكوك بيبقى معاهم تفويضات من الشركات دية فبيبقى معاهم البطاقة الضريبية والسجل الصناعى بتوع الشركات دية وياخدوا منهم تفويض لازم تفويض منهم باسم الشركة علشان يقدر يبعلهم بالتفويض ده الخامات اللى نازلة فى حصصهم على السجل الصناعى بتاعهم

فإنتا بتروح تتفق مع حد من العمال دول من اللى معاهم سجلات صناعية وبطاقة ضريبية من شركات تانية ومعاهم تفويض منهم وإذن دفع وتتعامل معاهم مقابل العمولة اللى انتا هتديهالهم اللى هيقولولك عليها والنسبة اللى بيخدوها منك دية بتبقى على حسب سحبك إنتا منهم وبرده على حسب إنتاجهم هما ( إنتاج شركة الكوك من قطفة الفينول )
فأحيانا تروح يقولك والله النسبة النهاردة 3% وأحيانا تروح يقولك لأ ده النسبة 5% وأحيانا لأ النسبة 8% على حسب كمية القطفة الموجودة يعنى على حسب إنتاجهم من قطفة الفينول وأيضا على حسب سحب الشركات منها يعنى إنتا بتروح بتسحب وأنا والثانى والثالث فتبص تلاقى عليها سحب جامد المصنع مثلا بيطلع 80 طن فى اليوم أو 100 طن فى اليوم فتبص تلاقى ال 100 طن ممكن لو فيه سحب جامد على الساعة 12 الظهر يكونوا خلصانين وده طبعا بيبقى فى فترة الصيف اللى هى شهر 5 ، 6 ، 7 ، 8 ،9 دية فترة الطحن بقى فى الشغل
وساعات النسبة ممكن توصل إلى 10% لما بيكون فيه ضغط جامد فى السحب على القطفة أو الإنتاج قليل



بس عامة النسبة عمرها ما تعدى ال 10 % اطمئن
وسبحان الله تيجى تروح فى الشتاء أحيانا بتبقى لسه امبارح واخد 5 براميل قطفة يقولك لو عاوز 10 براميل خد وعليها 3 % بس
وبرده فى الشتاء مش مقياس لإن ده كله متوقف على حجم سحب الشركات من القطفة وبرده على حسب إنتاجهم هما من القطفة

فالقطفة اللى انتا هتاخدها دية بتبقى نازلة على بطاقة وسجل شركة من الشركات وبتاخد منك نسبة عليها زى ما قلنا نسبة على إجمالى مبلغ مشترياتك من القطفة فهو بيديك القطفة عن طريق التفويض وإذن الدفع اللى واخده من الشركات دية مقابل العمولة بينهم​

 

[ممدوح الجيار]

فالناس دول بيساعدوك فى إيه فى حاجتين :

1_ إن إنتا لو ممعكش سجل صناعى فيخلصوك بالعمولة وخلاص فإنتا بترحم نفسك من السجل الصناعى

فالأفضل إنك إنتا تبعد نفسك عن السجل الصناعى وعن الكلام ده أهو إنتا بتخلص نفسك بالعمولة وخلاص لإن إنتا لسه بادىء فشغلك ميستحملش السجل الصناعى ومواويله

2_ نمرة إتنين إن هما بيبقوا على إتصال بيك على طول فيه قطفة فينول يقولولك تعلالى السبت تعلالى الإثنين تعلالى الأربعاء تقوم تاخد عربيتك وتروح وترن على تليفون اللى تعرفه منهم من برة أو بتتصل بيه من على البوابة يقوم يطلعلك ويدخلك ويبقى شايلك نصيبك من القطفة فبيقولك على اليوم اللى تروح له فيه لإن مش آى وقت تروح فيه لإن إنتاج القطفة مش إنتاجها على طول دية شحنة بتتعمل وبتتجهز كل مثلا 10 أيام كل 15 يوم مثلا وممكن كل شهر فتيجى مثلا الشركة النهاردة عملوا شحنة الشحنة بتتعمل النهاردة مثلا وتتحلل فى المعمل والمعمل يقول أوكى يعنى تطلع الشهادة بتاعتها أنها صالحة للبيع يقوموا مبلغين جهاز المبيعات وجهاز المبيعات يبلغ الشركات إن فيه قطفة موجودة عندنا للبيع يبلغوا مثلا يوم الأحد ومعاد الصرف البيع يعنى يوم الثلاثاء مثلا ولازم فى اليوم المحدد يوم الثلاثاء مثلا الصرف يبقى يوم الثلاثاء حتى لو راح ناس من الشركات الكبيرة اللى بتتعامل مع شركة الكوك بقالها سنين طويلة بالسجلات الصناعية وليها السبق إلى الخامات زى شركة النيل للأدوية وهى شركة قطاع عام وزى شركة العالمية للمنظفات بتاعة فنيك العاشر حتى لو راحت الشركات دية قبل الميعاد ميقدروش يحملوا خامات هو يوم الثلاثاء يبقى لازم يوم الثلاثاء فالكل يلتزم بالميعاد فالكل يروح يوم الثلاثاء يروح كل واحد يدخل الصبحية يسجلوا أساميهم كلهم يقوموا مدخلين الشركات الكبيرة الأول مثلا اللى هما شركة النيل للأدوية وشركة العالمية وشركة الجمهورية وكذا شركة من الشركات الكبيرة اللى معاها سجلات صناعية من سنين وبقالها سنين بتتعامل مع الشركة يقوموا مدخلينهم الأول لإن الشركات الكبيرة دية بياخدوا على طول حتى لو مفيش حد راح فى اليوم اللى أعلنت فيه شركة الكوك عن صرف القطفة للشركات ممكن الشركات الكبيرة دية تشيل الكمية كلها شحنة القطفة كلها الموجودة حتى لو 100 طن يقسموها على بعضيهم فلو فيه حد راح بقى والعدد كبير برة يقوموا ينظموا العملية يطلعوا مثلا نصف الكمية أو تلت الكمية للشركات الكبيرة دية ويجوا على التلتين الباقين من كمية شحنة القطفة يقوموا موزعينهم على الكام عميل اللى واقفين برة علشان يراضوهم يعنى مثلا يدوا لكل واحد 3 براميل 3 براميل كده حتى لو فيه ناس جات تانى يدوا للناس اللى جات تانى حتى لو كل واحد هيدوله برميل برميل كده المهم إنهم يراضوا الكل وكل واحد يرجع من الشركة مجبور الخاطر ويقدر يعبى شغل وياكل عيش فهما ماشين بسياسة كويسة



وطبعا فيه فائدة كمان فى معرفتك بالناس اللى هناك إنهم بيبقى معاهم زى ما قلنا حصص شركات تانية بالتفويض وإذن الدفع اللى واخدينهم منهم مقابل العمولة بينهم .
فممكن الناس دول ينفعوك إنك لو مقدرتش تيجى فى اليوم ده بتاع صرف الخامات ممكن يشيلو لك نصيبك بحيث لو روحت فى يوم تانى تلاقى نصيبك لإن زى ما قلنا بيبقى معاهم حصص بتاعة شركات تانية .
وعلى فكرة نسبة توفر القطفة فى شركة الكوك دلوقتى أحسن من الأول يعنى أحسن من السنوات اللى فاتت يعنى ممكن الناس دول اللى فى الكوك يوفرولك بتاع 4 أو 5 براميل ( طن يعنى من القطفة ) مش وحشين طبعا لو كل شهر يو فرولك مثلا 4 أو 5 براميل من القطفة مش وحش ​

 

[ممدوح الجيار]

وطبعا النسبة اللى احنا قلنا عليها قبل كده اللى بتتاخد منك على القطفة لو ممعكش سجل صناعى دية بتبقى نسبة على القطفة بس
لإن الكريزوت
زى ما قلنا قبل كده بيطلعلك سهل بالبطاقة الضريبية بعد إضافة كلمة تصنيع منظفات صناعية فيها مفهوش مشاكل
فالكريزوت بتطلعه رسمى بسعر الشركة بالبطاقة الضريبية زى ما قلنا قبل كده
حتى لو إنتا مش عامل بطاقة ضريبية خالص ممكن ياخدوا منك نسبة بسيطة عليه ويطلعهولك مفيش مشاكل .
وعلى فكرة أنا أعرف واحد من البحيرة كان بيجيب كريزوت بالبطاقة الضريبية أول ما راح شركة الكوك يعنى أول مرة راح فيها إداهم البطاقة الضريبية وأخدوا بياناتها وصورة منها وسجلوا بيانتها على الكمبيوتر عندهم وبعدين مرة واتنين كان بيتعامل بالبطاقة الضريبية تالت مرة راح خلاص العملية بقت عادى بقى ياخد من غير ما يشوفوا البطاقة وياخدوا بياناتها لإنه خلاص متسجل عندهم وهو كان لغى البطاقة بتاعته ووقفها من زمان من سنة 2004 ومازال بيسحب على اسمها يروح على البوابة يتصل باللى هو من طرفه من اللى اتعرف عليهم هناك فى الشركة يقوم يطلعله عند الحسابات ويصرفوله الكريزوت عادى على البيانات القديمة للبطاقة بتاعته اللى متسجلة عندهم على الكمبيوتر والعملية بقت عادى فطالما إنتا بقيت عميل عندهم واسمك هناك خلاص العملية بتمشى وممكن ميطلبوش منك البطاقة الضريبية من أصلها وممكن تبعت أى حد كمان مكانك يمضى مكانك العملية بتمشى مفيش مشاكل تديله بس تفويض منك ورقة كده مختومة بتوكيلك له
أهم حاجة زى ما قلتلك إتعرف على الناس اللى فى وحدة الفنيك والقطران من العمال والمهندسين اللى هناك فى وحدة الفنيك وهما يسهلولك كل حاجة لإن زى ما قلنا بيبقى معاهم سجلات صناعية لشركات كتير وإذن تفويض من الشركات دية لصرف الخامات للى يعوز مقابل العمولة اللى هيخدوها منك .​

 

[ممدوح الجيار]

طيب هنتكلم دلوقتى على سعر قطفة الفينول وسعر الكريزوت أما بالنسبة لسعر زيت النفتلين هنأخره دلوقتى لحد أما يجى دوره فى الكلام على القطفة المصنعة :​

طبعا أول حاجة هتعملها انك تروح شركة الكوك اللى هى فى ( التبين ) حلوان معروفة الشركة مجرد ما تركب الدائرى بتاع السلام لو انتا جاى من الطريق الدائرى هتدخل من نفق السلام زى ما انتا طوالى من الدائرى لا يمين ولا شمال وتعدى المعادى هيقابلك كارفور زى ما انتا برده طوالى من على الدائرى هتلاقى عند دخلة المعادى من الدائرى طالعة تدخلك على 15 مايو ومن 15 مايو برده طوالى لا يمين ولا شمال هتوصل التبين اللى فى حلوان قول بس هناك عند جهاز 15 مايو قول انا عاوز اروح شركة الكوك اللى هى فى التبين


وفيه طريق تانى من الكورنيش طريق حلوان على طول من الكورنيش ومختصر بس ممنوع دخول النقل فيه
طبعا اعذرونى لإنى فى حكاية الوصف ضعيف جدا


المهم هتروح الشركة وتوصل عند البوابة الرئيسية قول انا عاوز ادخل وحدة القطران جوة او اسهلك اول ما توصل الشركة قول انا عاوز ادخل للمبيعات وانتا جوة متدخلش المبيعات ادخل الأول عند وحدة القطران عند الحاج رشدى او خيرى او يسرى اى حد من اللى شغالين قوله انا عاوز ادخل اقابل حد فى وحدة القطران من اللى شغالين فى فنيك الشركة اللى هو فنيك الكوك وهناك شوف مثلا اى حد من اللى اديتك اسمهم او اى حد يعجبك تانى واتفق معاه على الخامات والنسبة اللى هياخدها منك ومتديش أكتر من 10 % وممكن تتفاوض معاه فى النسبة


وحاول على قدر المستطاع انك تتعرف على كل اللى هناك وتكسبهم علشان فى يوم ملقتش ده تلاقى التانى او التالت او الرابع وهكذا

المهم طيب السعر الرسمى اللى بيطلع بيه قطفة الفينول من الشركة هو 7250 جنيه للطن يعنى البرميل ال 200 كيلو ب 1450 جنيه
وبالنسبة لو قالولك 10 % عليه يبقى البرميل ال 200 كيلو ب 1600 جنيه
وطبعا القطفة زى ما قلنا كده كده هتاخدها بالنسبة لإنها بتنصرف رسمى بالسجل الصناعى فقط وأوقات لما بيكون مفيش زحمة عليها او السوق مريح بتنصرف ممكن بالبطاقة الضريبية ولكن فى الغالب الأعم بالنسبة
وزى ما قلتلك معظم الشركات على كده بتاخد القطفة من الكوك بالنسبة دية اللى هى ال 10 %

أما بالنسبة للكريزوت فلو معاك بطاقة ضريبية مكتوب فيها تعبئة او تصنيع منظفات صناعية يبقى هتاخد الكريزوت رسمى بسعر الشركة اللى هو 6200 جنية الطن يعنى البرميل ال 200 كيلو ب 1240 جنيه
ممعكشى بطاقة ضريبية يبقى هتدفع عليه النسبة وهى ال 10 % يعنى البرميل ال 200 كيلو هيبقى ب 1400 جنيه

طبعا زى ما قلتلك هتروح الأول هناك من غير العربية وبعدين تتعرف على الناس اللى هناك اللى هما فى وحدة القطران جوة وتتفق معاهم وبعدين هما هيقولولك تعلالى يوم كذا وهات معاك براميل فاضية على قد اللى هتاخده
نقول مثلا لو انتا عاوز لسه تبدأ على قدك هتاخد معاك برميلين فاضيين اللى هى البراميل الصاج المقفولة بطبات زى اللى وريتهالك فى الصور قبل كده فى أول الموضوع واول ما توصل البوابة هتتصل باللى اتفقت معاه هيسيبلك التفويض بتاع القطفة او بتاع الكريزوت او التفويضين مع بعض لو ممعكش بطاقة ضريبية علشان تجيب الكريزوت بيها
المهم هتوزن البراميل فاضية وهى على العربية على الميزان البسكول اللى عندهم وبعدين تدخل مع اللى اتفقت معاه علشان تملىء القطفة والكريزوت فيهم
لو قولنا انك هتجيب أول مرة برميلين واحد قطفة والتانى كريزوت وهتدفع عليه النسبة لو ممعكش بطاقة ضريبية للكريزوت
يبقى برميل قطفة 200 كيلو بالنسبة 1600 جنيه
وبرميل كريزوت 200 كيلو بالنسبة 1400 جنيه

يبقى هتجيب خامات من الكوك ب 3000

​

 

[ممدوح الجيار]

يبقى كده احنا اتكلمنا على الخامات اللى هتيجى من شركة الكوك

هنتكلم دلوقتى على باقى الخامات اللى هتشتريها من برة من شركات الكيماويات

___ هنجيب خامة اسمها قلفونية ده الأسم اللى بتيجى بيه من بلدها من الصين وليها اسم تانى ( رجينة )

وفيه منها نوعين موجود فى السوق :
1 _ قلفونية WW

2_ قلفونية WG

احنا هنجيب ال WW

وهقلك القلفونية دية بتيجى من ايه او متكونة من ايه عارف زيت التربنتيا اللى هو بيحصلوا عليه من أشجار الصنوبر لما بيجوا بيزيلو جزء من قشرة شجرة الصنوبر ويعملوا حز فى الجذع فيسيل منه سائل راتنجى يتجمد على هيئة كتلة لزجة تسمى بالتربنتينا ( TURPENTINE ) ولما يجوا يقطروا الأخير مع بخار الماء يتجمع زيت التربنتينا فى الوعاء المستقبل ويتبقى فى جهاز التقطير كتلة صلبة تسمى بالقلفونية
فالقلفونية هى خليط من أحماض وأهمها حمض الأبيتيك وللأملاح القلوية لهذه الأحماض تأثير سطحى نشيط ولذلك غالبا ما تستعمل القلفونية كمادة إضافية عند تحضير بعض أنواع الصابون اللتى لها قدرة كبيرة على تكوين الرغوة وكذلك بتستخدم كمستحلب فى إنتاج المطاط الصناعى وكذلك بتستخدم لإنتاج الطلاء وكذلك بتستخدم مع الشب لتغطية الورق بالغراء
وبرميل القلفونية ده بيبقى لونه فضى والقلفونية عبارة عن كتلة واحدة صلبة جواة وزنها 225 كيلو

ودية صور لبرميل قلفونية بعد ما تم فتحه بالدق عليه من برة بالمطرقة الكبيرة

ودية صورة لقطعة قلفونية من البرميل

​

 

[ممدوح الجيار]

والبرميل سعر الكيلو فيه هو 22.5جنيه
لإن السعر متقلب فى الفترة الأخيرة فيها كان من شهر 14 جنيه الكيلو فى البرميل ومن سنة 8 جنية فى البرميل وبيقولوا انها بتنزل وبتطلع فى السعر ساعات فلما تشترى فى الغالى هات منها على قد شغلك بس لإنها بينزل سعرها تانى ولما ينزل سعرها ويستقر شوية هات لو معاك ارشين زيادة 3 او 4 براميل منها لإنها لما بينزل سعرها غالبا بيغلى بعديه تانى ​

وهى عامة بحالات متعرفشى امتة السعر يبقى كويس
والبرميل بيتباع على بعضه لإنه بيبقى مبرشم معرفشى إذا كان فيه حد من الشركات بيفتحوا ويبيع منه بالكيلو
بس أكيد لإن سعرها غالى اليومين دول قوى أكيد شركات كتير بتفتح البرميل وبتبيع منه بالكيلو
وسعر البرميل 5062.5 جنيه ووزنه 225 كيلو ​

وفيه أكثر من شركة ممكن نشترى منها القلفونية :​

فى الدقهلية :
1_ شركة رفعت علام لإستيراد الكيماويات من الخارج _ المنصورة _ شارع عبد السلام عارف _ تقسيم سامية الجمل _ برج الحاج رفعت علام أمام حى غرب
_ 0502356140 _ 0502248175 _ 0502210261
وده من المستوردين الكبار فى مصر​

فى الغربية :​

1_ شركة المشد والغرابلى _ الحاج أيمن الغربلى _ طنطا _ ميت حبيش البحرية _ 0403071007_ 0403071055_ 0403070263
2 _ وليد شلبى للكيماويات _طنطا _ سوق الفسيخ _ 0403352545 _ 0120712726
3_ شركة الرضوان للكيماويات _ محمود سعيد _ طنطا _ شارع طه الحكيم تقاطع شارع سعد الدين _ 0403343252 _ 0105601667
4_ شركة رجب للكيماويات _ أيمن الصلحاوى _ طريق بسيون من طنطا _ كفر سليمان أو الحداد _ عزبة الصلحاوى _ 0105262459 _ 0133103339
1_ مصنع محمد الجبالى للكيماويات _ قويسنا _ المدينة الصناعية _ 0123484845​

فى القاهرة :​

1_ مروان جروب _ عادل موسى مروان _ استيراد كيماويات عامة _ القاهرة _ 33 شارع الجيش _ العتبة _ 0225899672 _ 0225904286
2_ مؤسسة محمد مروان للتجارة _ محمد موسى مروان _ 31 شارع الجيش _ العتبة _ 0229240567 _ 0122134670 _ 0101300381
وعامة فيه كذا شركة كيماويات فى شارع الجيش فى العتبة ممكن تروح زيارة وتعرف الأسعار​

فى الأسكندرية :
1_ القيار للاستيراد والتصدير
14 ش سليم حسن
الشاطبى _ الاسكندرية​

التليفون: 035924990 _ 035909074
وده مستورد كبير جدا فى الأسكندرية​

 

[ممدوح الجيار]

2_ هنجيب شكارة صودا كاوية أو شكارتين اللى معروفة عند عوام الناس بالبطاس

وأفضل صودا تشتغل بيها الصودا القشور وأفضلها بتاعة القوات المسلحة المصرية المعروفة عند شركات الكيماويات بالشكارة الصفراء بتاعة القوات المسلحة بتاعة شركة النصر للكيماويات الوسيطة

وهذه صور ليها :

وطبعا زى ما انتم شايفين الصور ان تركيزها من 98 _ 99 %

والشكارة بيبقى وزنها 25 كيلو ب 85 جنية وهتلقيها عند شركات الكيماويات اللى انا ذكرتها عند الكلام على القلفونية

طيب لو ملقنهاش ممكن نجيب اى صودا قشور تركيزها يكون عالى هتلاقى فى السوق منها الصينى او الأردنى او السعودى أو اى نوع المهم تكون صودا قشور تركيزها يصل ل 98 % علشان تصبن معانا كويس عند عمل صابونة الفنيك
​

 

[ممدوح الجيار]

3_ هنجيب حوالى 3 كيلو مادة على شكل البودرة لونها ابيض وناعمة زى البودرة


ودية مادة مش أساسية فى الفنيك
ولكن هنستخدمها فى بعض التضريبات وخاصة الفنيك السايل السوبر اللى بيتعبى فى جراكن 20 لتر وجمدانات 60 لتر فهنستخدمه كمادة مالئة متخنة للفنيك لرفع لزوجة الفنيك السائل
والمادة دية اسمها المعروفة بيه فى السوق هو :
(تايلوز) (tylose) واسمها العلمى هو هيدروكسى ايثيل سلليلوز"hydroxy ethyl cellulose"
وسعرها عندنا فى مصر 45 جنيه للكيلو فى الشكارة ومنشأه ألمانى وفيه منه إيطالى الشكارة بيبقى مكتوب عليها "scmc" يعنى صوديوم كربوكسى ميثيل سلليلوز وده سعره عندنا 28 جنيه للكيلو فى الشكارة ومنشأه إيطالى​

بس انتا هات الألمانى الأولانى افضل واحسن فى نتائجه وجودته ممتازة وانا جربته وناس كتير فى نفس الصنعة نصحونى بيه


وهو بيشترى من شركات الكيماويات اللى احنا ذكرناها قبل كده فى الكلام على القلفونية

​

 

[ممدوح الجيار]

4 _ هنجيب خامة هى أساسية فى بعض التضريبات وغير أساسية فى بعض التضريبات بس لازم تكون موجودة عندنا لإن فى الغالب بنخليها أساسية فى أغلب شغلنا وهذه الخامة هى ( فينول كريستال )( phenol crystal )

وهو بيأتى فى برميل وزنه 200 كيلو وفيه منه كذا منشأ فى السوق ألمانى ساسول وإيطالى وجنوب أفريقيا

إحنا هنجيب بتاع جنوب أفريقيا المنشأ أرخصهم وأنا صراحة جربته ممتاز جدا
وسعر الكيلو فى البرميل 15.5 جنية يعنى البرميل يعمل 3100 جنية

وهو بيأتى من الشركات السابق ذكرها عند الكلام على القلفونية والصودا والتايلوز
انا طبعا بجيب بالبرميل أوفر وضمان انه مبرشم ومن بلده
وفيه فى القاهرة فى شارع الجيش شركات كتير بتبيع الفينول بالكيلو بس صراحة انا معرفشى منشأه اللى بيتباع سايب بالكيلو ولا سعره ولا إذا كان مضمون ولا لأ لإنى مجبتوش سايب بالكيلو قبل كده المهم ممكن تذهب إلى هناك وتسأل الشركات كلها اللى فى شارع الجيش وعلى رأسهم شركة مروان جروب اللى ذكرتها قبل كده وشركة سمير نيرول على ما سمعت إن حاجتهم مضمونة
وعندك برده الشركات التانية اللى انا ذكرتها زى اللى فى قويسنا واللى فى طنطا وغيرهم كتير وممكن انتا تلاقى شركات تانية فى محافظتك انتا دور واسأل
ومادة الفينول اللى بتبقى فى البرميل عبارة عن كريستال صغير على شكل سكر النبات

وبعد اما بتشتريه بيتم تسييحه آى تحويله من الحالة اللى عليها وهو كريستال صغير إلى سائل

وهنبقى نشرح ذلك بالتفصيل عند الكلام على طرق التصنيع


ودية صور لبرميل الفينول اللى منشأه جنوب أفريقيا:

​

 

[ممدوح الجيار]

5_ هنجيب حوالى جمدانتين فاضيين ( فارغتين يعنى أقصد علشان نعبى فيهم الجاز الأبيض ) ونشترى فيهم جاز أبيض يعنى حوالى 120 لتر جاز ابيض هو لتر الجاز الأبيض ب 1.5 جنية من مصدره من كوبانية الجاز أو هتشتريه من أى دكان بقالة أو من أى مكان
المهم يكون جاز أبيض مش جاز مخلوط على سولار زى ما بيتغش ​

 

[ممدوح الجيار]

6 _ هنجيب خامة هنشتريها من شركة اسكندرية للزيوت اللى فى كفر الزيات وهى اسمها
زيت محمض

وهو عبارة عن ايه زيت مرتفع الحموضة فهما فى الشركة هناك الزيت اللى مرتجع عندهم من الزيوت النقية اللى عندهم زى زيت بذرة القطن او الصويا مثلا اللى هو الغير نقى اللى هو الدرجة اللى بيقولوا عليها ثالثة بياخدوه ويوضع له نسبة صودا 1% او 1.5 % يعنى يتعمله عملية مسولاج فيبقى عبارة عن صابون يقوموا بعد كده حاطين عليه حامض كبرتيك مركز تركيز 98 % يقوم يدينى فى النهاية زيت مرتفع الحموضة اللى هو بيسموه زيت محمض عبارة عن ( مسولاج + حامض كبريتيك ) فيدينى فى النهاية زيت أسمر سائل قابل لنسبة بسيطة من التجمد فى الشتاء اما فى الصيف فبيبقى على حالته السائلة
والزيت ده بنشتريه من شركة اسكندرية للزيوت اللى فى كفر الزيات وبشتريه عادى من غير ورق ولا اجرائات اى اقصد من غير بطاقة ضريبية ولا سجل يعنى اى حد ممكن يشتريه من غير اى اجراءات

وسعر الكيلو 3.1 جنية ( ثلاثة جنيهات وعشرة قروش ) واى كمية انتا عايزها بيدوهالك حتى لو كيلو واحد

واحنا هنعوز كمية بسيطة منه حوالى 100 كيلو

وعنوان الشركة :

كفر الزيات فى مدخلها من على الطريق

0402542830 _ 0402542677 _ 0402547300



_ وفيه كمان زيت تانى هنجيبه هو عبارة عن زيت بذرة قطن غير مهدرج يعنى غير صالح للإ ستخدام الآدمى بس مش هنجيبه من شركة اسكندرية للزيوت ده هنجيبه من معاصر زيت بذرة القطن وطبعا اسأل فى القرى والأرياف القريبة منك على معاصر زيت بذرة القطن

عامة انا بجيبه من معاصر فى بلدين فى المحلة فى الطريق الدائرى بتاعها ( بلد اسمها الجبرية _ وبلد اسمها عزبة راتب قريبة من الجبرية ) ودول اكبر بلدين تبع المحلة عندهم معاصر زيت بذرة قطن

اهم حاجة تجيب الزيت من عندهم نقى خالى من الشوائب لإن هما بيحطوه فى بيارة عندهم بير يعنى بعد اما يعصروا بذرة القطن بياخدوا الزيت ويحطوه فى بيارة ويسيبوه لمدة يومين علشان الرواسب اللى فيه تنزل تحت فى قاع البير فانتا لو رحت لأى معصرة شوف الأول لو الزيت بقاله كذا يوم فى البيارة خد من فوق الوش النقى اللى هو مش مرسب اما لو رحت ولقيت البيارة فيها شوية صغيرين غالبا متخدش منها لإن ده بيبقى فيه رواسب كتير حاول تاخد الزيت لما البيارة تكون عالية والزيت بقاله اكثر من يومين فيها علشان تضمن عدم الرواسب

المهم علشان مطولش عليكم زيت البذرة ده بنعوذه فى تضريبات السوبر بيتعمل منه فنيك غالى نعبيه فى ازايز وتركيزه بيبقى مقارب جدا لتركيز فنيك العاشر او فنيك عابدين وبيتعمل منه كمان فنيك سايب مركز بدرجاته

فالزيت ده بيبقى انفع للتضريبة اللى بيبقى فينولها عالى طبعا انا هشرح الكلام ده بالتفصيل

المهم الزيت ده هنعوذ منه 200 كيلو لإن احنا بناخد منه حاجات بسيطة
وسعر الكيلو حاليا 3.5 جنية لإن الأسعار مش ثابتة فى السوق بترجع لحسب سعر البذرة وانتاجها





​

وفيه تليفون واحد انا بتعامل معاه من عزبة راتب : اسمه الحاج هانى : 0124936212

وفيه تليفون واحد انا بتعامل معاه من الجبرية : اسمه الحاج عبد الله الديب : 0104401160​

 

[ممدوح الجيار]

7_ هنجيب حوالى 1 كيلو من مادة تشبه حبات السكر بيضاء اللون اسمها بولى أكريمالي معروفة عند محلات الكيماويات باسم بولى

وهذه المادة بتستخدم فى الصابون السائل احيانا بتعطى عرق للصابون السائل فاحنا بنستخدمها هنا فى الفنيك علشان تعطى عرق للفنيك وتزود فى لزوجته

وهذه الخامة الكيلو فيها ب 35 جنيه
وهو بيأتى من شركات الكيماويات السابق ذكرها

وبكده نكون إتكلمنا على الخامات اللى بنحتاجها فى تضريبات الفنيك المختلفة من سوبر سايب وشعبى سايب وسوبر معبأ وشعبى معبأ
_____________________________________

وهنبتدى إن شاء الله دلوقتى نتكلم على تضريبات الفنيك المختلفة سواء سوبر ( عالى التركيز ) أو شعبى ( مخفف التركيز ) أو وسط ( متوسط التركيز )
وسنذكر إن شاء الله التصنيع بالتفصيل مع رفع الصور لعمليات تصنيع تمت قبل ذلك

وأوعدكم ايضا إن بعد أما ينتهى الموضوع إنى أحاول أرفع لكم بعض تضريبات للفنيك مصورة فيديو​

 

[ممدوح الجيار]

أولا : تركيبة برميل 200 كيلو من الفنيك السوبر المركز السائل بتركيز عالى جدا بالنسبة للموجود فى السوق وبسعر مناسب للسوق
وهو يتم تعبئته فى جراكن مستعملة سعة 20 لتر وجمدانات مستعملة سعة 60 لتر
ويتم بيع الطن منه سواء فى جراكن او جمدانات لمحلات المنظفات بالجملة ب 3500 جنية الطن من غير حساب ثمن الفوارغ لإن احنا قلنا قبل كده ان الفوارغ سواء جراكن او جمدانات بناخد مكانها فوارغ تانية او بناخد ثمن الفوارغ اذا لم نأخذ بدل لها
وبيعه قطاعى لمحلات المنظفات القطاعى الجركن ب 80جنية والجمدانة ب 240 جنية
( عامة مسألة كيفية البيع لمحلات المنظفات الجملة او القطاعى ونبذة عن السوق بصفة عامة وبصفة تفصيلية من ذكر ايجابياته وسلبياته سنأخرها بعد ذكر مراحل التصنيع حتى لا تتشتت الأذهان ) كده كده هنتكلم على طرق التسويق والعروض بالتفصيل وبطريقة علمية وتجارية


المقادير :


5 كيلو زيت بذرة قطن


11 كيلو قلفونية


200 جرام تايلوز أو 250 جرام


100 جرام صودا لسرعة تخمر التايلوز واذابته


2.180 كيلو صودا قشور تركيز 98 % ويفضل بتاعة شركة النصر للكيماويات ( بتاعة شركة القوات المسلحة الشكارة الصفراء اللتى ذكرناها قبل ذلك )


10 كيلو كيروزوت


26 كيلو قطفة فينول


2 كيلو فينول كريستال


4 لتر جاز أبيض ( يعنى يساوى 3.200 كيلو بوزن الكيلو لإن اللتر يساوى 800 جرام )


من 10 _ 15 ملو شفشق صغير اللى بيزن 1.5 لتر من الماء من محلول البولى ​

 

[ممدوح الجيار]

طبعا فيه خامات سيتم تحضيرها قبل البدأ فى التضريبة
مثل :
1 _ القلفونية :
طبعا احنا هنا فى تضريبة السوبر المركز السائل الذى سيتم بيعه فى جراكن وجمدانات احنا قلنا اننا هنحتاج 11 كيلو قلفونية
طيب دلوقتى احنا ذكرنا قبل كده ان القلفونية بتأتى فى برميل مبرشم وزنها صافى 225 كيلو وقلتلكم انى انا سمعت ان فيه بعض شركات بتفتح كم برميل وبتبيع منها بالكيلوات حسب ما انتا عاوز المهم سواء جبت القلفونية فى برميل او جبت على قد التضريبة بالكيلوات بنحتاج اننا نكسر هذه القلفونية بالمطرقة وبعد ذلك يتم الدق عليها حتى تصبح ناعمة مثل الرمل
طبعا الكلام ده موجه أكثر للى بيشترى بالبرميل لإنه كده كده هيحتاج انه يفتح البرميل سواء بالدق عليه جامد اكثر من مرة بالمطرقة الكبيرة حتى يفتح وبعدين ناخد منه على قد شغلنا ونضعه فى شكاير وبعدين ننعمه بالدق على الشكارة من برة جيدا حتى يتم تنعيم القلفونية لتصبح ناعمة مثل الرمل

وهقلك على حاجة اسهل ليك ان انتا لما تشترى برميل قلفونية ان انتا اول حاجة قبل ما تفكر حتى انك هتضرب ايه اى نوع من الفنيك انك تفتح البرميل وتحطه كله فى شكاير موزونه بالتساوى وبعدين تنعم الشكاير من برة بالدق عليها زى ما قلنا حتى تصبح القلفونية ناعمة مثل الرملة بحيث انك بعد كده وقت عمل اى نوع من تضريبات الفنيك المختلفة هتحتاج قد كده من القلفونية تبقى جاهزة عندك بدل ما لسه هتقعد تكسر فيها ولسه كمان هتنعمها فانتا لو جبيت برميل قلفونية جبت اتنين جبت ثلاثة افتحهم كلهم الأول وبعدين عبيهم فى شكاير وبعدين امسك كل شكارة ودق عليها من برة بالمطرقة حتى تصبح ناعمة مثل الرملة ده هتلقيه اسهل ليك احتاجت كمية كبيرة كمية صغيرة هتلاقيها جاهزة .

المهم اننا فى تضريبتنا السوبر دية هنحتاج زى ما قلنا 11 كيلو قلفونية متكسرين ومتنعمين زى الرمل

( والقلفونية مش مادة ضارة يعنى لو لمستها او مسكتها حتى بايدك ولا حاجة هى بس لو ايدك كانت متعاصة قلفونية وجت عليها ماية تلزق شوية فى ايدك فتحتاج انك تغسلها جامد
لإن القلفونية تصنيفها فى الأساس مادة نباتية لإن احنا زى ما قلنا قبل كده ان مصدرها من أشجار الصنوبر فيفضل انك تكون لابس جوانتى علشان بس لو ايدك عرقت او جات عليها ماية متلزقش فى ايدك وتقعد تغسل فى ايدك جامد علشان تطلع )

ودية صورة لبرميل قلفونية بعد ما تم فتحه

ودية صور لبرميل قلفونية تم فتحه وتعبيته فى شكاير

​

 

[ممدوح الجيار]

ملحوظة :

لما تكلمت عن كيفية تنعيم القلفونية وذلك بالدق عليها بالمطرقة بعد تعبئتها فى شكاير لتصبح ناعمة مثل الرملة كان مقصدى مش انى أطحنها أو أنعمها جامد لأ يعنى على قدر المستطاع حتى لو بقت عاملة زى الحجارة الصغيرة بحجم عقلة الإصبع أو أصغر شوية فليس شرط انى أنعمها مثل الرملة لإنى انا لما قلت كده زى الرملة كان مقصدى انها متبقاش كتل كبيرة مثلا قد كف الإيد علشان لما أجى أسيحها على النار الكتل الكبيرة هتاخد وقت حتى تسيح فكل اما تكون صغيرة زى الحصو او الحجارة الصغيرة فى حجم عقلة الإصبع او أصغر شوية تقوم تسيح بسرعة ولا تأخذ وقت
وانا بخليها صغيرة زى حجم الحجارة اللى قد عقلة الإصبع او أصغر شوية ليه انا بعمل كده كمان علشان سهولة تسيحها وكمان علشان متبقاش حمل على الماتور خاصة لما أجى اشتغل فى الخلاط الكبير ال 2 طن او ال3 طن أو..... أو وعلشان كمان لا تأخذ وقت
لإن فى البرميل بتبقى العملية سهلة ومش بحتاج الماتور فى اول شغلى أقصد يعنى انا مش بشغل الماتور لما بكون بشتغل فى برميل الا لما القلفونية تسيح طبعا الكلام ده هنشرحه بالتفصيل لإن احنا لسه بنتكلم فى طريقة تحضير بعض المواد قبل البدأ فى عملية التصنيع
​

 

[ممدوح الجيار]

2_ أيضا من المواد اللتى سيتم تحضيرها قبل البدأ فى عملية التصنيع وهى :
مادة البولى أكريماليد ( اللى هى معروفة عند محلات بيع المنظفات والكيماويات اللتى ذكرناها قبل كده بمادة البولى ) وهى مادة زى ما قلنا قبل كده انها تشبه حبات السكر بيضاء اللون
وهذه المادة سيتم تحضيرها كالتالى :
هنحضر بستيلة بلاستيك من البستيلات اللى ذكرناها قبل كده وهنرفع صورة برده ليها هنا وهنوزن فيها ماية لحد 23 لتر ماء ثم نوزن 50 جرام من مادة البولى ونرشهم على سطح الماء الموجود فى البستيلة مثل ما بنرش الملح للطعام ونحاول نخليه كله يترش على سطح الماء متفرق عن بعض وميغطسش فى الماء ولا نقلب ثم يترك لمدة 12 ساعة دون تقليب وبعد ال 12 ساعة نقلب البستيلة جيدا فنجد ان هذه المادة قد أعطت الماء لزوجة عالية جدا ويسمى هذا بمحلول البولى ثم نتركه لحد اما يجىء دوره فى التصنيع

​