مسرحية القرار

[mohamedabdalahf]

مسرجية القرار
الفصل الاول
المنظر الاول
ورشة ميكانيكى يقف عسلية اسفل غطاء السيارة
عسلية: ولا يا بلية دور العربية
بس خلاص اهى دارت اهية
يمسح يدة بفوطة ويرتدى قميصة
عسلية:خلى بالك من الورشة يا حمار
لحد ماروح اوصل لمشوار
بلية: حتغيب يا اسطى
عسلية : اللة اعلم انا رايح لحد الشركة
بلية: شركة اية يا اسطى
عسلية: يلا مانا ابويا مات وفاتلنا تركة
مش باقى منها غير شركة
انا واخواتى فيها شركا
بلية: بس انت ملكش تقل يا اسطى على شركة وادارة
عليك باية من دة الغلب
عسلية: يلا افهم انا ناوى اخد نصيبى واقب
اعبى الشريط اللى نفسى فية
واعملى كام فيديو كليب
بلية: قشطة يا اسطى وتلم حواليك الوظاويظ
عسلية: اة يا واد وفالبت بطة راح اغيظ
قال اية فرحانة بالدبلون
ومش معبرانى
لما بقيت زى المجنون
قصرة سلام
بلية: سلام يا اسطى
يرزقكم من حيث لا تحتسبون
********
المنظر الثانى
داخل شقة علية وزوجها فوزى
علية: انا نازلة يا فوزى مش عاوز حاجة
الاكل عندك فالتلاجة
خلى سوزى ليك وللولاد تسخنلكوا
الاولاد: جود مورنينج يا ماما انتى خارجة
علية: اة يا ولاد بعد ما ترجعوا من المدرسة
خلى سوزى تذاكرلكوا واسمعوا الكلام
يلا سلام
الاولاد: سى يو يا ماما باى
فوزى: سلام يا علية وتشغليش بالك وخدى وقتك
اف اخيرا يا باى
********
المنظر الثالث
داخل شقة عدنان وزوجتة
الزوجة: انت بتفتح لية الباب
خارج ولا اية يا سى عدنان
مهى وكالة من غير بواب
عدنان:ماانا قايلك يا حياتى انا رايح الاجتماع مع الشباب
الزوجة: طيب متنساش تجيب الولاد من المدرسة
عدنان: حاضر
الزوجة: وتجيب عصاية للمكنسة
عدنان: حاضر
الزوجة: والخضار يا عدنان
عدنان: حاضر
الكوسة والبدنجان
عدنان: حاضر
الزوجة :عارف لو نسيت زى كل مرة
راح اعمل فيك اية
عدنان: عارف يا حبيبتى خلاص اوكية
عدنان هامسا: اف كل شوية شخط ونتر
عيشة تقصر العمر
الزوجة: بتبرطم لية يا عدنان وانت بتنزل
عدنان: ابدا يا حبيبتى انا بقول دعاء الخروج من المنزل
**************ا
المنظر الرابع
فى مكتب عميد الجامعة
العميد : اهلا يا دكتور عزت ازى الحال
عزت: الحمد للة يا سيادة العميد عال
العميد: ها تشرب اية
عزت متشكر يافندم انا طلبت من البوفية
العميد: طيب قولى قررت اية؟
عزت: قصد حضرتك البعثة
العميد: ايوة اللى فالنمسا
عزت : مانا سبق وقلت لسيادتك انا احب ولادى
يتربوا على عاداتنا الشرقية
وانت عارف سيادتك العادات الاوروبية
فمش حاقدر اسافر ودة قرارى الاخير
العميد: بس انا شايف انك تعيد التفكير
دى فرصة بتستناها زمايل لك كتير
وانت دكتور فالاقتصاد وراح يبقى لك شان كبير
عزت: يا فندم .......
العميد: حتندم
انا حديلك مهلة تفكر
وابقى رد عليا لما تقرر
*********
المنظر الخامس
فى شقة علوان وزوجتة
الزوجة: يلا يا علوان انا جهزت خلاص الفتة
علوان: فتة اية بس تعالى اربطيلى الكرافتة
الزوجة: مش حتتغدة
علوان: لما اجى ولا عاوزانى انام فالاجتماع
دة اجتماع مصيرى الليلة
وانتى عارفة انى كبير العيلة
حنقسم اللى باقى من التركة
وحنشوف راح نعمل اية فى الشركة
الزوجة: طب خلى بالك يا خويا وحرص
لحسن تطلعنا من المولد بلا حمص
علوان: مولد اية بس انتى فاكرانى عبيط يا ام حسين
الزوجة : فشر ياخويا طول عمرك سيد العاقلين
انا قصدى بس تاخد الموضوع بهمة
علوان: متخافيش اخواتى اصلا بيحبونى
وكمان عندهم ذمة
الموضوع بس عاوز سياسة وحكمة
يلا باة سلام
********
المنظر السادس
فى داخل صالة رياضية للملاكمة يتدرب عثمان
المدرب : الة اية يا ابو الكباتن على فين
عثمان: ابدا يا كوتش اخواتى اصلهم مستنيين
وانا خلصت خلاص التمرين
المدرب: شد حيلك الماتش باقى علية شهرين
عثمان: متخافش يا كوتش انا ناوى ارفع راسك
المدرب: ركز على نقطة الضعف فخصمك
وخليك متبت عليها وماسك
وربنا يوفقك وكلة على اللة
عثمان: ان شاء اللة
وفى طريقة لخارج يوقفة رجل قصير وبدين
البدين: كابتن عثمان انا جبتلك حباية معتبرة
دخت لما لقيتها فى السوق الحرة
عثمان: متشكر باين عليها من بلاد برة
********
يجلس يعقوب فى السيارة ويركب البدين الى جوارة فى مقعد السيارة
يعقوب: ها عملت اية
البدين : كلة تمام يا يعقوب بية
يعقوب: اديتلة زى ما قلتلك الحباية
البدين: وشربها قدامى مع العصير فالكوباية
الا صحيح سعادتك
هى دى هرمونات
يعقوب: لا يا روح خالتك
دى مخدرات
البدين:يا خبر دة انت كدة حتخلية مدمن
يعقوب: اة علشان انا ابقى مطمن
مهو انا لازم اوقعهم واحد واحد واخد الشركة
وكلة بالسياسة ومن غير اى عركة
البدين: بس اللى يشوف كدة ميقولش انك جوز اختهم
يعقوب يعنى هما كانوا موافقين
انا خدتها غصب عنهم
يرن جرس محمول يعقوب
يعقوب: الو ايوة يا سوزى فى اية
طيب طيب الل تشوفية
باى
البدين : مش دى البت الخوجاية المزغودة
يعقوب: اة ماانا زرعتها فبيت المحروسة اخت مراتى
تنقلى اسرارهم اول باول
وجوزها تغوية ليلاتى
ويقعوا فالفخ
وبالمرة تعمل لعيالهم غسيل مخ
مش هما اللى بيحبوا الموضة
البدين : يا ابن الاية سعادتك
يعقوب ضاحكا: طب سوق بقى وخليك فخيبتك
***********
الفصل الثانى
المنظر الاول
يجلس الاخوة الستة فى قاعة الاجتماعات فى الشركة ويتراس الاجتماع علوان
علوان : ازيكو يا ولاد عاملين اية
عسلية: اللة يسلمك يا ابية
علوان ضاحكا: حلوة ابية دى يا ولا
حبتها منين يا ابن الاية
واللة العظيم عليك حاجات
احم نخش فالموضوع علطول
احنا خلاص قسمنا وى مانتو عارفين التركة
ومش فاضل غير الشركة
نعمل فيها اية
اللى عندة راى يقول
ويكون فعلمكم
انا جالى كذا مشترى وفلوسهم جاهزة
اولهم يعقوب جوز اختكم
عزت: هو مش كفاية اللى اتباع من التركة
لو فرطنا فالشركة دى كمان
مش راح يبقى لينا كيان
احنا ممكن نطورها ونعدلها
ونخليها تشتغل احسن من ايام زمان
علوان : بس الحالة مبقتش زى الاول
والمنافسين ممكن يفعصونا
وزى الليمون يعصرونا
ولو بعناها الحالة راح تتبدل
علية: بقول نبيعها ونعمل مشروع على قدنا
نكسب منة كلنا
حاجة كدة متفردة
بوتيك مثلا او اتيلية لهدوم مستوردة
وانا شايفة ان الاقربون اولى
نديها ليعقوب يمكن يخلى عندة دم
المفترى ليل ونهار يضرب فالمسكينة
ومشيلها ليلاتى الهم
وهى لا قوة ولا حول
عزت : دة بعدة انتى فاكرة انة لو اخد الشركة حيتغير
دة حياخد القرشين وعليها راح يتدور
يذل فيها ويتحكم براحتة
عثمان : احنا نخلية يطلقها ورجلة فوق رقبتة
علوان: هى كل حاجة عندك عافية ولازم تعمل جناية
دة ممكن يدوخنا وراة فى محاكم وقضايا
الامور لازم نتعامل معاها بحكمة
علشان نشوف ازاى راح نطلع من الازمة
عسلية: بصوا باة اختكم ربنا يتولاها
انتو ناسيين ان فى كوم لحم وراها
اما بالنسبة للشركة انا شايف
ان انا اخد حقى ناشف
عزت: انت مبتفكرش غير فنفسك
انت اية يا اخى الشيطان لابسك
مش دى تبقى اختك زى ماهى اختنا
حتة منا لحمنا ودمنا
عسلية: ياعم باة بطل تنطيط
عايزين نعبى باة الشريط
وبعدين اختكم دى مش الموضوع الاساسى
انا جاى النهاردة علشان اعرف رجليا من راسى
ونشوف حنعمل اية
متقول حاجة يا سى عدنان ساكت لية
عدنان: اللى تشوفوة يا جماعة انا موافق علية
علوان: متهيالى مشروع البوتيك دة مش بطال
عزت: وانا بقولك دة كلام فارغ و لعب عيال
نسيب حاجة حقيقية ونمسك فحتة لعبة
شركتنا بتدخل للبلد عملة صعبة
عسلية : بلا صعبة بلا سهلة وحياتك
الكلام دة تقولة للتلامذة فمحاضراتك
وياريت تنقطنا بسكاتك
عزت: احترم نفسك واتكلم باحترام
عدنان: اهدوا يا جماعة بقى دة اسمة كلام
عثمان: مانت طلعلك حس اهو يا جوز المدام
عسلية: ملكش دعوة بية بقولك
عثمان: الظاهر انا لازم اقوملك
علوان بس عيب الة
ولا كانى موجود
مش عاملينلى اى اعتبار
جايين نتخانق ولا ناخد قرار
احنا ناجل الاجتماع النهاردة
يوم تانى باة لحد ما اعصابكم تهدا
تفكروا براحتكم تبقوا تبلغونى بالرد يا ريت
عدنان لنفسة: وكانك يا ابو زيد ما غزيت
**************
المنظر الثانى
يجلس يعقوب مع الخواجة والشخص البدين
الخواجة : عملت اية يا علوان مع الجماعة بتوع الشركة دول
يعقوب: صبرك عليا يا خواجة اللى يصبر ينول
انا برقد لهم بالراحة
العملية مش قفش على طول
اختهم اللى هى مراتى خاتم فصباعى
والاخت التانية جوة بيتها دراعى
وعثمان خلاص حيدمن
وعلوان بياكل فالفتة ومطمن
البدين
طب وعسلية وعدنان سعادتك
يعقوب : انا مشفتش زى خيبتك
يلا دول تعتبرهم اصلا مش موجودين
الاولانى دماغة صفيحة زبالة
والتانى عايش فالدنيادى عالة
الخواجة: طب وعزت حتعمل معاة اية
يعقوب: دة باة سيبونى انا بنفسى اخش علية
**************
المنظر الثالث
عزت فى قاعة المحاضرات وامامة الطلبة
عزت: ودلوقتى حد عندة اسئلة
اتفضلى
الطالبة: يا دكتور انت شرحت ازاى الاقتصاد العالمى
تحول من الاشتراكية الى الراسمالية
عزت: مظبوط
الطالبة: بس انا شايفة ان التحول دة مالهوش لازمة
لان الشعوب بتعانى ولسة فى ازمة
طالب اخر: ممكن ارد يا دكتور
عزت: اتفضل
الطالب: انا رايى ان السبب ان الاشتراكية ماخدتش الفرصة
مش كانت احسن من الخصخصة ولا اسمها اية البورصة
طالب ثالث: يا دكتور انا رايى ان الازمة
حدثت نتيجة التقليد الاعمى
نريدها خلافة اسلامية
لا شرقية ولا غربية
طالب رابع: واللة يا دكتور من الاخر
الجماعة دول تاعبين نفسهم عالفاضى
وكل واحد عاملى نفسة قاضى
احنا نشوف مصلحتنا فين من غير صداع
شيلنى واشيلك وبزنس از بزنس
وكدة وبتاع
عزت: كدة وبتاع
هو يوم باين من اولة
شوية شيوية تقولى العملية فالنملية
انا بقول نكمل المحاضرة اللى جاية
جاتكوا الهم حالتكو تغم
***********
المنظر الرابع
امام الجامعة كان يعقوب فى انتظار عزت
يعقوب: دكتور عزت
عزت: نعم فى حاجة
يعقوب: انت لسة زعلان
انت فاهمنى غلط انا معملتش حاجة
عزت نبقى نتكلم بعدين انا تعبان
يعقوب: مش حاطول عليك الموضوع باختصار
دة شيك على بياض
حط فية المبلغ اللى عاوزة وبالدولار
عزت : ودة مقابل اية
يعقوب :دة مقابل حصتك فالشركة
اللى حنبقى بتاعتى
عزت: انا مش ....
يعقوب : لا متردش عليا دلوقتى
خد وقتك وفكر على مهلك
العيشة بقت صعبة
واللى ميعملش حساب بكرة راح يهلك
وزى ما قولت لك المبلغ اللى يعجبك بالدولار
وابقى كلمنى لما تاخد قرار
**************
المنظر الاخير
يدخل عزت الى منزلة فيرى ابنتة تشاهد اغنية مصورة فالتلفزيون
فيتخيل انة يرى اخوة عسلية يغنى وعلية ترقص وباقى الاخوة يطبلون
عزت صائحا : قومى يا بت واطفى الزفت
وانتى يا هانم سايباها تتفرج عالمسخرة والهلس
وفين الواد على
الزوجة: خرج وراح الدرس
عزت: درس اية
الزوجة: درس الجغرافيا عند الاستاذ خلوصى
عزت: ابنى انا بياخد درس خصوصى
الزوجة: اصل الامتحان قرب و...
عزت: خلاص خلاص
اعملى حسابك احنا حنسافر
انا حاقبل البعثة
الزوجة: حنروح النمسا؟
بس انت لسة....
عزت: لا خلاص مش حينفع نقعد هنا تانى
الزوجة: اة يانى
مترسالك على بر
عزت: يا ستى انا حر
الزوجة : مش كنت خايف على الولا
من عاداتهم الغربية
يخرج عزت الى الناذة ويقول متاملا
يقلدوا الغرب فالثقافة والحرية
احسن ما يعيشوا هنا جهلة
من غير هوية
النهاية

 

[لطفي الياسيني]

استاذي الكبير الفاضل محمد
اقف اجلالا لعبق حروفك وابحارك في مكنونات
الذات الانسانية فاجدني عاجزا عن الرد حيث
تسمرت الحروف على الشفاه جزيل شكري وتقديري
لما سطرت يداك المباركتان من حروف ذهبية
دمت بخير
ابو مازن

 

[محمد شتيوى]

الفاضل / محمد عبد الله

قرأت مسرحيتك ويعكس ثقافة واسعة وخبرة كبيرة بالثقافة الشعبية المصرية
فهناك شخصية المرأة المتفرنجة المتمثلة فى علية
وشخصية الزوج الخانع المتمثلة فى شخصية عدنان
وشخصية الزوجة التقليديةالمتمثلة فى زوج علوان

وهانك بعض القوافى البارعة التى أعجبتنى مثل
الزوجة: طب خلى بالك يا خويا وحرص
لحسن تطلعنا من المولد بلا حمص

علوان: متهيالى مشروع البوتيك دة مش بطال
عزت: وانا بقولك دة كلام فارغ و لعب عيال

وتضمبن المثل الشعبى هنا
تفكروا براحتكم تبقوا تبلغونى بالرد يا ريت
عدنان لنفسة: وكانك يا ابو زيد ما غزيت

عسلية: ملكش دعوة بية بقولك
عثمان: الظاهر انا لازم اقوملك

لكن هناك بعض الملحوظات المتمثلة فى عدم إجادة اختيار بعض أسماء الشخصيات
فاسم الشاب عثمان غير واقعى لأن هذا الاسم ليس من الأسماء الشائعة بين الشباب
كما أن اسم عسلية وإن كان يناسب مهنة الميكانيكى ولكن كان ينبغى اختيار اسم وسط
ليناسب رجلا أخوه استاذ فى الجامعة
ممكن فوزى أو صبحى مثلا

ملحوظة أخرى وهى إحساسى بأن المسرحية تفتقد الحبكة التى تربط بين أجزاء القصة بخيوط وهمية وثيقة
بحيث تشعر بالواقعية مما يقنع القارئ
مثلاً خدعة المخدرات أراها ساذجة إذ لا يتوقع أن ينهار شاب من مجرد قرص مخدرات وحيد
وشخصية يعقوب الماكر الذى يدبر المكائد ويتحين الفرص لم تقنعنى
وأراك لم تستطرد فى كيفية سيطرة العادات الغربية على الشعب وتحدثت عن بعضها وهو أمر يستأهل الاستطراد
لكى يشعر القارئ بمدى الخطر
إن أى قصة ناجحة فى رأيى ينبغى أن تكون كلا مترابطا بحيث تكون كل كلمة لخدمة الفكرة نفسها

أما عن فكرة المسرحية نفسها
فإنها تتحدث عن ضياع الهوية بين الشعب وتبعيتهم العمياء للغرب
مما حدا بأستاذ الجامعة إلى اتخاذ قراراه الذى مانع فيه طويلاً بالسفر إلى أوروبا

أما قولك :
يخرج عزت الى الناذة ويقول متاملا
يقلدوا الغرب فالثقافة والحرية
احسن ما يعيشوا هنا جهلة
من غير هوية

يمكن أن نترجم هذه النهاية على أنه استنهاض لهمم الشعب ليبادر بالحفاظ على هويته قبل أن يفر صفوته إلى الأعداء فيخسر المجتمع بذلك كثيراً
على أننى افضل أن تكون النهاية هى مزيد من استمساك أستاذ الجامعة بهويته
وصمود فى وجه العواصف والأعاصير العاتية
ولكن الحل لا تسر فى واقع الأمر

تحية طيبة
ومزيداً من الإبداع​